Şənbə, 23 Mart 2019
USD : 1.7
EUR : 1.996
Hava
+6 ° Baku
-0 ° Quba
-0 ° Qusar
+4 ° Gəncə
+5 ° Lənkəran
+3 ° Naxçıvan
+6 ° Salyan
+3 ° Şəki

Vidadi Zeynalov vəzifəli şəxsləri kompromatla qorxudur

2015-ci ilin oktyabr ayında həbs edilən keşmiş Rabitə və Yüksək Texnologiyalar Nazirliyinin sabiq Aparat rəhbəri Vidadi Zeynalov azadlığa buraxıla bilər


Sabiq Aparat rəhbərinə yaxın şəxslərdən biri deyib ki, noyabrın 7-də Bakı Apellyasiya Məhkəməsi Bakı Ağır Cinayətlər Məhkəməsinin kəsdiyi 13 il həbs cəzasını azaltdıqdan sonra Vidadi Zeynalovun ailəsinin onun azadlığa çıxacağına ümidi artıb. 

Qeyd edək ki, Apellyasiya Məhkəməsi Vidadi Zeynalovun cəzasını 4 ilə endirib. V.Zeynalov isə 4 il cəzanın 2 ilindən çoxunu istintaq müddətində çəkib. Üstəlik, o, dövlətə vurduğu 7 milyon manatdan çox vəsaiti geri ödəyib. Məhz buna görə, onun müsadirə olunan əmlaklarının bir qismi özünə qaytarılıb. Yəni, məhkəmə hökmü ilə mülklərin bir qisminin üzərində olan həbs və müsadirə qərarı dəyişdirilib. Bunlar isə V.Zeynalovun vəziyyətini yüngülləşdirir. Ancaq bundan da vacibi ortada siyasi iradənin olmasıdır. Yəni, siyasi elita V.Zeynalovun azadlığa buraxılmasına etiraz etmir. 

Digər bir mənbə isə iddia edir ki, komromat qorxusu yaşayan bəzi vəzifəli şəxslər də məcburiyyət qarşısında qalaraq, V.Zeynalovun azadlığa çıxmasına çalışırlar: “Ona görə də Zeynalovun Ali Məhkəmə tərəfindən azadlığa buraxılma şansı yüksəkdir. Artıq sabiq Aparat rəhbərinin vəkilləri Ali Məhkəməyə şikayət ərizəsini də hazırlayıblar”.

Ehtimal olunur ki, Ali Məhkəmə ən uzağı qarşıdakı 3 ay ərzində şikayətə baxıb, V.Zeynalovu elə məhkəmə zalından azadlığa buraxa bilər: “Mümkündür ki, onun indiyədək çəkdiyi cəza kifayət sayılsın, yaxud da şərti cəza ilə evə buraxılsın”.

Vidadi Zeynalovun üzərindən həbs götürülən əmlaklarna gəlincə, mənbəmiz deyib ki, həmin əmlakların hamısı ona verilməyib: 

“Vidadi Zeynalov və yaxınlarının ümumi dəyəri 44 milyon manata yaxın olan 70-ə yaxın əmlakının üzərinə həbs qoyularaq, müsadirəsinə qərar verilmişdi. Bildiyimə görə, artıq həmin əmlakların böyük qismi satılaraq, 7 milyon manatdan çox zərərin ödənilməsinə sərf edilib. Bu, bir neçə gün əvvəl mətbuatda üzərindən həbs götürülən əmlaklarla bağlı açıqlanan siyahıdan da açıq görünür”. 

Belə ki, Bakı Apellyasiya Məhkəməsinin qərarına əsasən, müsadirə olunan əmlaklardan yalnız Vidadi Zeynalovun oğlu Pərviz Zeynalovun adına olan Bakı şəhəri, Xətai rayonu, Telnov küçəsində olan mənzil, Vidadi Zeynalovun bacısı Əminə Seyidovaya məxsus Nobel prospektində olan mənzil, qohumu Fuad Kərimova məxsus Bakı şəhərində olan iki mənzil, qohumu Bəxtiyar Nuriyevin adına olan Bakıda yerləşən 6 mənzil, bacısı Kəmaləyə məxsus bir mənzil, Vidadi Zeynalovun adına Səbail rayonunda olan üç mənzil, qızı Lalə Zeynalovaya məxsus 4 mənzil, bacısı Əminəyə məxsus bir mənzil və bir qeyri-yaşayış sahəsi, bacıları Kəmalə və Əminəyə məxsus daha bir neçə mənzil, oğlu Pərvizə məxsus İsmayıllıda yerləşən torpaq sahələri, qohumu Günel Hüseynlinin adına olan və Xırdalanda yerləşən torpaq sahəsi özlərinə verilib. Yəni, geri qaytarılan əmlakların böyük hissəsi qohumlarının adına olub: “Müsadirə edilən mülklər arasında daha çox bahalı daşınmaz əmlaklar da var. Ancaq Zeynalovun daha dəyərli əmlaklarından söz açan yoxdur. Hansı ki, məsələn, dəyəri 620 min manat hesablanan Qaradağ rayonu, Sənqəçal qəsəbəsi, Əsas küçə 25 ünvanında yerləşən dəniz mənzərəli villa, dəyəri 135 min 400 manat hesablanan Qaradağ rayonu, Şanqar qəsəbəsində yerləşən 15 hektar torpaq sahəsi, dəyəri 1 milyon 500 min hesablanan Səngəçal qəsəbəsi, Əsas küçə 29 ünvanındakı torpaq sahəsi və üzərində yerləşən daha bir villa, həmçinin Bakı, Qəbələ və digər bölgələrdə yerləşən mülklərini Vidadi Zeynalov birdəfəlik itirib”.

Məlumata görə, V.Zeynalovla bağlı qərarın kəskin dəyişməsinə təkcə əldən çıxan əmlakları deyil, eyni zamanda bəzi vəzifəli şəxsləri də dolaysı ilə hədəfə almasıdır. Bütün bunlar V.Zeynalovun azadlığa çıxması üçün “yol xəritəsi”dir:

“Bildiyiniz kimi, o, hər məhkəmə prosesində bəzi şəxslərlə bağlı sensasiyalı faktlar açıqlayırdı. O, hər prosesdə kompromatların sayını artırırdı. Bu isə çoxlarını narahat edirdi. Belə bir vəziyyətdə Vidadi Zeynalovun vurulan bütün zərəri ödəməyə hazır olması, əksər mülklərindən imtina etməsi gərginliyi səngitdi və onun mərhələli şəkildə azad olunma planına “hə” deyildi. Noyabrın 8-də ikinci məhkəmə instansiyası 13 ildən 9 ilini götürdü, son məhkəmə instansiyası isə yekun qərarını verəcək”.

BTRİB-in rəisi Beytulla Hüseynovun cəzasının 4 ilə deyil, 7.6 ilə düşürülməsinə gəlincə, mənbə deyib ki, Zeynalovla Hüseynovun nə statuslarını, nə də vəziyyətlərini müqayisə etmək doğru deyil: “Ən əsası, o, sabiq MTN rəhbər Eldar Mahmudovla yaxın qohumdur. Üstəlik, onun xarakteri ilə Vidadi Zeynalovun xarakteri çox fərqlidir. Özündən həddən artıq müştəbeh olan Beytulla Hüseynovun 13 il cəzasının 7.6 ilə düşürülməsi gözlənilməz idi. Görünür, həbs edilənlər haqqında verilən ümumi qərar və onun da ödədiyi zərərin səviyyəsi bu qərara təsir edib. Sözsüz ki, o da digərləri kimi azadlığa qovuşmaq üçün çalışırdı və yenə də çalışır. Lakin mən inanmıram ki, Ali Məhkəmə Eldar Mahmudovla bağlı qeyri-müəyyənliyin davam etdiyi bir ərəfədə onu azadlığa buraxsın. Mümkündür ki, onun cəzasının 1-2 ilini götürsünlər. Amma son məhkəmə instansiyasında onun azadlığa çıxma ehtimalı çox azdır”. 

Onu da qeyd edək ki, Vidadi Zeynalov Bakı Apellyasiya Məhkəməsinin qərarından kassasiya şikayəti verib.

Reyting.az-ın xəbərinə görə, V. Zeynalovun qardaşı Vahid Zeynalov APA-ya bildirib ki, dünən Ali Məhkəməyə təqdim olunan şikayətdə ailə üzvlərinin bəzi əmlakları üzərinə qoyulan həbsin götürülməsi istənilir:

“Anamın, bacımın adına olan mülklər var ki, onların da üzərinə həbs qoyulub. Halbuki bunların Vidadi Zeynalovun işi ilə heç bir əlaqəsi yoxdur”.

Onun sözlərinə görə, V. Zeynalovun barəsindəki cinayət işi ilə bağlı Bakı Apellyasiya Məhkəməsinin qərarından kassasiya şikayəti verilməyəcək: “Bu şikayət yalnız mülki məsələ ilə bağlıdır”.

Qeyd edək ki, Bakı Ağır Cinayətlər Məhkəməsinin hökmünə əsasən, Rabitə və Yüksək Texnologiyalar Nazirliyinin sabiq Aparat rəhbəri Vidadi Zeynalov 13 il, Bakı Telefon Rabitəsi İstehsalat Birliyinin baş direktoru Beytulla Hüseynov 13 il, “Optik Rabitə, Tikinti və Quraşdırma” MMC-nin direktoru Namazalı Məmmədov 11 il, Emin Məmmədov 10 il, Anar Mustafayev 5 il, Qəmbər Bəybalayev 3 il müddətinə azadlıqdan məhrum edilib.

Məhkəmə Məhəmməd Məmmədov, Oktay Rüstəmov, Səhlab Hümbətov, Cəlil Cəfərov, Bayram Vəliyev barəsində 2 il sınaq müddəti təyin etməklə şərti cəza seçib, onlar məhkəmə zalından azadlığa buraxılıblar.

Təqsirləndirilən şəxslərin hamısından 119 milyon 468 min pulun müştərək qaydada alınaraq, Rabitə və Yüksək Texnologiyalar Nazirliyinin balansına keçirilməsi haqqında qərar qəbul edilib.

Bakı Apellyasiya Məhkəməsinin qərarı ilə Vidadi Zeynalovun cəzası 4 ilə, Bakı Telefon Rabitəsi İstehsalat Birliyinin baş direktoru Beytulla Hüseynovun cəzası 7 il 6 aya endirilib.

“Optik Rabitə, Tikinti və Quraşdırma” MMC-nin direktoru Namazalı Məmmədov barəsində isə 2 il sınaq müddəti ilə şərti cəza seçilib, o, məhkəmə zalından azadlığa buraxılıb. Emin Məmmədov və Anar Mustafayev barəsində də 2 il müddətinə şərti cəza seçilib və onlar iclas zalından azadlığa buraxılıblar.

Qəmbər Bəybalayev barəsində də şərti cəza seçilib və o, məhkəmə zalından azadlığa çıxıb.(Reyting.az)

pia.az
Etiket:
loading...