Cümə axşamı, 28 Mart 2024
USD : 1.7
EUR : 1.8724
Hava
+25 ° Baku
+18 ° Quba
+17 ° Qusar
+22 ° Gəncə
+27 ° Lənkəran
+32 ° Naxçıvan
+30 ° Salyan
+19 ° Şəki

Valokardin


Tofiq Bayram - "Qadın ürəyi", "Görüş" , "Valokardin"


PİA.AZ saytı oxucularına şairin duyğu dolu şeirlərindən bir neçəsini təqdim edir:

Qadın ürəyi 

Necə rəhmlidir, necə amansız,
Necə mehribandır qadın ürəyi!
Sən onu sındırsan, bil ki, a qansız,
Ağlayan kamandır qadın ürəyi.

Güldürsən, ömürlük səadətindir,
Söndürsən, yanmağı bir də çətindir.
O, əsl qayğının, məhəbbətindir,
Sevgisiz zindandır qadın ürəyi.


Daşı da əridər, daş da olar o,
Əriyib gözlərdə yaş da olar o.
Bahar da olar o, qış da olar o,
Damladır, ümmandır qadın ürəyi.

Onunla dünyadır sənə qəfəs də,
Onsuz heç yaşama bu torpaq üstə.
Sevən bir ürəyə axır nəfəsdə
Ən gözəl dərmandır qadın ürəyi.

Onu alçaldan da, ucaldan da biz,
Dərd verib, vədəsiz qocaldan da biz.
Qədrini biləndə bu cahanda biz,
Həmişə cavandır qadın ürəyi.

Bəzən gül tək solar acı bir sözdən,
Ağlayar xəlvəti, gülsə də üzdənE
Bəzən uşaq kimi bir ürəksizdən
Məhəbbət umandır qadın ürəyi.

Bir namərd əlindən zəhər içəndə,
Keçirər ömrünü o, yas içində.
Bəzən ən qiymətli libas içində,
Nalədir, fəğandır qadın ürəyi.

Sənsiz əl çəkərəm arzudan, kamdan,
Nə çıxar sevgisiz-sənsiz ilhamdan?
İncitsən, dözərəm, Tofiq Bayramdan
İncimə, amandır, qadın ürəyi!




Görüş


Biz ki,unutmuşduq ilk məhəbbəti,
Ah,bu qəfil görüş kaş olmayaydı!
Mənim gözlərimdə eşqin həsrəti,
Sənin gözlərində yaş olmayaydı!

Mən də bəxtiyaram,sən də bəxtiyar,
Bəs bu həsrət nədir, --bu məlal nədir?
Saxlama qoy gedim, gözləyənim var,
Gedimmi? Bir "hə" de, o sual nədir?

Dayanma qarşımda günahkar kimi,
Mən ki, günahını bağışlamışam.
Hələ qəlbi geniş adamlar kimi
Sənin toyunu da alqışlamışam.

Bil ki, sevgilimdən sənə salam var,
İstəsən ərinlə qonaq gəl bizə.
Mənim ciyərparam bircə balam var,
Açar qapımızı əlbəəl sizə.

Niyə zilləmisən gözlərini sən?
Mənə əvvəlki tək baxma,amandır!
Mən ki, əl çəkmişəm məhəbbətimdən,
Qəlbimi odlara yaxma,amandır!

Peşiman olmağın nədir əlacı?
üz fikir bir borcu ödəməz indi.
Mən sənə qardaşam, sən mənə bacı,
İlk eşqə tapmısan bir əlac indi.

Yanmasın, ulduzum tez yanıb sönsə,
Vədəsiz şadlığı istəmərəm mən.
Özgənin eşqinə göz dikməkdənsə,
Həsrətin qoynunda can verərəm mən.
Sevcin, əziləyin, bir-birinizi,

Ayrılıq diləsəm dilim lal olsun.
Qolboyun, mehriban görəndə sizi
Mənim şair könlüm qoy xoşhal olsun.
Şirin söz eşitsəm dodağınızdan,

Bilin ki, sədası ürəyimdədir.
Gəlsə körpə səsi otağınızdan,
Hər xeyir-duası ürəyimdədir.
Pozmaram bir evin birliyini mən.

Görsəm ev yıxılır,gedib quraram.
Əl əldən soyusa, ürək ürəkdən,
Sizi eşqinizə qovuşduraram.
Gəl nə peşiman ol,nə qəlbini sıx.

Çətindir o günə qayıtmaq, çətin.
Əvvəli sevincdir, sonu ayrılıq
Taleyi gətirmir ilk məhəbbətin.
Qoy bu ürək sözüm getməsin hədər.

Məni sevirsənsə ismətini sev
Mən öz sevgilimi sevdiyim qədər,
Sən də öz ərini qismətini sev!

Biz ki,unutmuşduq ilk məhəbbəti
Ah,bu qəfil görüş kaş olmayaydi.
Mənim gözlərimdə eşqin həsrəti,
Sənin gözlərində yaş olmayaydı...





Valokardin

Döş cibimdə valokardin
Gəzdirirəm valokardin.
Anam məndən hey soruşur:
"Axı nədir, bala dərdin?
Axı sənin nə yaşın var,
Bükülürsən yumaq kimi?
Səni görmək istəyirəm
Əyilməyən bir dağ kimi.
Ürəyindən ağrı qopur,
Sinəm olur para-para.
Söylə xəstə ürək hara,
Mən böyüdən oğul hara?
Qurban olum, at biryolluq
O zəhrimar papirosu.
Qurban olum, o masanın
Üstündəki yazı-pozu
Qoy yarımçıq qalsın.
Mənə gərək deyil adın-sanın.
Sən gərəksən mənə, oğul.
Ağrımasın təki canın"
Ağrımasın!
Kim istəyər
Öz canından gileylənə.
Yazıq anam ilhamı da
Qənim sayır indi mənə.
O, nə bilsin ürəyimi
Nə ağrıdır, nə göynədir.
Sevincimdən xəbəri var,
Xəbəri yox dərdim nədir?
Dərdim nədir?
Qoy özüm də
Cavab verim bu suala
Neştər olub sancır məni.
Dərd ürəkdə qala-qala:
Mənə ləkə vuran olsa,
Ürək dözər.
Mənə tələ quran olsa,
Ürək dözər.
Ürəyimi qıran olsa,
Ürək dözər.
Öz atamın silləsinə,
Bir dostun söz gülləsinə
Gərib sinə,
Ürək dözər.
Qaranəfəs ucalsam da
Şeirin çətin pilləsinə,
Ürək dözər.
Bir dostumun məzarını qucaqlasam,
Ürək dözər.
Ürəyimdə gizli-gizli
Mən ağlasam,
Ürək dözər.
Ürək dözər!
Bu ağrıya
Valokardin gərək deyil.
Bir ürək ki, əzab çəkmir,
Ürək deyil, ürək deyil!
Ürək dözmür, nadan sənə
Alim kimi dərs deyəndə.
Öz işinin xatirinə
Susub onu dinləyəndə.
Ürək dözmür bilə-bilə
İkiləyib özünü sən
Evdə bir cür danışasan,
İşdə bir cür
Ürək dözmür.
Ən müqəddəs duyğuların
Ürəyindən çıxıb köçür.
Ürək dözmür hiylələrə,
Ürək dözmür yalanlara.
Ürək dözmür həm sənətkar,
Həm diplomat olanlara.
Sən ürəyi aldadırsan,
Ürək səndən acıq alır,
Ürəyində sağalmayan
Ağrı qalır, acı qalır.
İnləyirsən, bükülürsən,
Sübhə kimi keşiyində
Ana qalır, bacı qalır.
Deyir:- Nədir, bala, dərdin?
-Valokardin verin mənə,
Valokardin!
-Gəl nəbzimi yoxla, ana!
-Oğul, nəbzin yaxşı vurur.
-Yoxla, ana, yoxla ana,
Dincəl barı.
Bəlkə mənim öz cəzamdır!-
Bu ağrıya,
Bu əzaba gərək düşəm.
Mən dilimlə ürəyimin
Arasına sədd çəkmişəm.
Dodağımdan çıxmasa da,
Ürəyimi üzə-üzə
Gizli qalan cəsarətim
Ağrı olub çıxır üzə.
İtirsə idim vicdanımı,
Bu ağrılar heç olmazdı.
Mən ürəksiz yaşasa idim,
Ürək belə sarsılmazdı.
Hər ürəyim ağrıyanda
Demə, nədir, bala, dərdin.
Valokardin gətir, ana,
Valokardin!

pia.az


Etiket:


Digərxəbərlər

General Mövlam Şıxəliyevin 2 milyondan çox əmlakı özünə qaytarıldı - Siyahı

Putinin ilhaq və səfərbərlik qərarı - Bundan sonra müharibənin taleyində hansı faktorlar əsas rol oynayacaq?

Populyar xəbərlər

Aprel ayında bu bürcü fantastik pul və yeni vəzifə gözləyir

Məşhur vəkilə qarşı ittiham: 7 min manat pul alıb    

Politoloq: Ukraynadan sonra növbəti qurban Ermənistan seçiləcək...

Ərəstun Oruclu: Ermənistanda və Moldovada konfliktlərin qaynar fazaya keçməsini istisna etmirəm...

Sabiq milli təhlükəsizlik naziri Namiq Abbasov vəfat edib

Azərbaycan XİN Namiq Abbasovun vəfatı ilə bağlı paylaşım edib

Əhməd Əhmədov təcridxanaya qaytarıldı - Bundan sonrakı hüquqi qiymətləndirmə necə olacaq?

Hikmət Hacıyev NATO-nun eks-baş katibi ilə bağlı paylaşım edib: Hesabatına ödənişi əlavə etməyi unudub

“Crocus”da insanları xilas edən Emil Hüseynov və anası baş verənlərdən danışdılar - Video

Ən çox oxunanalar