Politoloq: “Rakkadan sonra bütün diqqətlər neft bölgəsi olan Deyr ez Zor, Mayadin və Abukəmal ərazisinə yönələcək. Beləliklə, Suriyada savaş yeni mərhələyə qədəm qoymaqdadır”.
“İŞİD məğlub olmaq üzrədir və geri alınmış torpaqlarda ağalıq üstündə mübarizə daha da kəskinləşib. Tərəflər onu da bilirlər ki, onlar ayrı-ayrılıqda sabit Suriya qura bilməyəcəklər”.
Bu sözləri politoloq Zaur Məmmədov Türkiyəli hərbi ekspert Kərəm İldırımın Suriyada ABŞ-Rusiya müharibəsinin başlana biləcəyi ehtimalını şərh edərkən PİA.AZ-a açıqlamasında qeyd edib.
Ötən həftə beynəlxalq terror təşkilatı İŞİD-in özünə paytaxt elan elədiyi Rakka üzərində Suriya hərbi təyyarəsi ABŞ tərəfindən vurulduqdan sonra Rusiya Müdafiə Nazirliyi bundan sonra Rusiya zonasına girən bütün təyyarələri “tutacağını” bəyan eləmişdi. Qərb mətbuatı isə bunu Rusiya tərəfindən NATO təyyarələrinin vurulacağı kimi dəyərləndirib. Ağ Evdən isə Rusiyanın bu təhdidinə qarşı bildirilib ki, ABŞ öz maraqlarının müdafiəsi üçün hər şeyi edəcək.
Bu barədə mətbuata açıqlama verən Türkiyəli hərbi ekspert Kərəm İldırım bildirib ki, Tramp ABŞ daxilində öz reytinqini qaldırmaq üçün Suriyada vəziyyəti bilərəkdən gərginləşdirir və buna görə də Suriya ordusuna zərbələr endirir. Tramp adminstrasiyasının Bəşər Əsədi müdafiə edən və Vaşinqtonun Suriya ilə bağlı planlarını pozan Rusiyanın bu yolla səbrinin həddini yoxladığını qeyd edən hərbi ekspertin fikrincə, Türkiyənin sərhədlərində, Suriyada ABŞ-Rusiya müharibəsinin başlanması istisna olunmur. Türkiyəli hərbi ekspert vurğulayıb ki, bu halda NATO üzvü olan Türkiyə hərbi alyans qarşısında öz öhdəliklərini yerinə gətirmək üçün məcburən Rusiya təyyarələrini vuracaq, rus hərbiçilərini öldürəcək. Kərəm İldırımın sözlərinə görə Tramp adminstrasiyası məhz daxili problemlərdən qaçmaq üçün Suriyada böyük müharibə hazırlığı içindədir və Suriya problemini tamamilə unutduracaq olan bu böyük savaş bütün Yaxın Şərqi öz alovları içində yandıracaq ki, bu da Türkiyənin bölgədəki maraqlarına tamamilə ziddir.
Mövzu ilə bağlı PİA.AZ-ın əməkdaşı politoloq, siyasi elmlər üzrə fəlsəfə doktoru Zaur Məmmədovun fikirlərini öyrənib.
Zaur Məmmədov: “İŞİD terror qruplaşması sıxıldıqca böyük güclər daha da həyacanlanaraq bir- birini arenadan çıxarmaq istəyirlər”.
Dünyanın qlobal təhlükəsizliyi baxımından ABŞ-Rusiya müharibəsinin mümkünsüz olduğunu vurğulayan politoloq Zaur Məmmədova görə, sadəcə olaraq indiki gedişatlar Suriyada savaşın yeni mərhələyə keçməsinə işarədir:
“Son günlər Rakka və ümumillikdə Suriyada aləm yenə də bir-birinə dəyib. ABŞ, Rusiya və İran öz maraqlarından çıxış edərək Suriyada bir-birinə qarşı mübarizədə daha da prinsipiallıq nümayiş etdirirlər. Çünki İŞİD məğlub olmaq üzrədir və geri alınmış torpaqlarda ağalıq üstündə mübarizə daha da kəskinləşib. Tərəflər onu da bilirlər ki, onlar ayrı-ayrılıqda sabit Suriya qura bilməyəcəklər. Bazar ertəsi günü ABŞ və Rusiya arasında okeanın o tayının ordusu tərəfindən vurulan Suriya təyyarəsi tərəflər arasında ciddi söz atışmalarına gətirib çıxarıb. Lakin ABŞ və Rusiya arasında birbaşa müharibəni istisna edirəm. Bu, mümkün deyil. Digər tərəfdən isə, tərəflər arasında müharibə üçüncü ölkələr vasitəsilə həyata keçirilir.
Zaur Məmmədov: “ABŞ və Rusiya arasında olan qarşıdurma həm Bakı, həm də Ankara üçün əlverişlidir”.
ABŞ və Rusiya arasında olan qarşıdurmanın Azərbaycan və Türkiyəyə təsirinə gəlincə, tərəflər arasında münaqişənin olması həm Bakı, həm də Ankara üçün əlverişlidir. ABŞ və Rusiyanın ortaq mövqedən çıxış etməsi regionda bir çox problemlərə gətirib çıxara bilər. İŞİD terror qruplaşması sıxıldıqca böyük güclər daha da həyacanlanaraq bir- birini arenadan çıxarmaq istəyirlər. İndi Suriyada strateji əhəmiyyətli bölgələr uğrunda Rusiya, ABŞ və İran arasında mübarizə gedir. İran və Rusiya ABŞ-a təslim olmaq iqtidarında deyilllər. Rakkadan sonra bütün diqqətlər neft bölgəsi olan Deyr ez Zor, Mayadin və Abukəmal ərazisinə yönələcək. Bu həftə İran Suriya müharibəsi başlayandan ilk dəfədir ki, ölkədən ölkəyə ballistik raket atdı. Beləliklə, Suriyada savaş yeni mərhələyə qədəm qoymaqdadır”.
Gülşən ŞƏRİF
pia.az