Türkiyə Rusiyadan “Su-57” qırıcı təyyarələri də ala bilər

Türkiyə ABŞ istehsalı olan "F-35" qırıcılarının əvəzində Rusiyanın "Su-57" qırıcılarını ala bilər

Bu barədə "Yeni Şafak" qəzeti mötəbər mənbəyə istinadən məlumat yayıb.

Əgər ABŞ Rusiyadan "S-400" zenit-raket komplekslərinin alınması ilə əlaqədar "F-35"-lərin Türkiyəyə satışına mane olarsa, bu halda Ankara Rusiyadan "Su-57" qırıcılarının alınmasına dair qərar qəbul edə bilər.

Qeyd edək ki, 2017-ci ilin dekabrında Türkiyə və Rusiya "S-400"lərin Türkiyəyə satışı ilə bağlı kredit müqaviləsi imzalayıb. Türkiyə Rusiyadan iki "S-400" batareyası alacaq. Tərəflər "S-400"lərin Türkiyədə istehsalı sahəsində də əməkdaşlıq etmək barədə razılığa gəliblər.

Rusiyadan "S-400"lərin alınması məsələsi ilə bağlı ABŞ və NATO rəsmiləri dəfələrlə Türkiyəni tənqid ediblər. ABŞ dövlət katibinin köməkçisi Uess Mitçell bildirib ki, "S-400"lərin alınması Türkiyənin ABŞ-dan "F-35" tədarük etməsinə mənfi təsir göstərəcək. ABŞ Nümayəndələr Palatası da Rusiyadan "S-400"lər alınacağı təqdirdə Türkiyəyə "F-35" qırıcılarının satışına qadağa qoyulması barədə qanun layihəsini qəbul edib. Qanun layihəsi növbəti mərhələdə Senatda müzakirəyə çıxarılacaq. Yekun mərhələdə bu sənədi ABŞ prezidenti imzalamalıdır.

Türkiyə xarici işlər naziri Mövlud Çavuşoğlu isə bildirib ki, əgər ABŞ "F-35" qırıcılarının satışına mane olarsa, Ankara cavab addımları atacaq.(APA)

pia.az