Tanınmış rejissor Hacıbala Abutalıbovdan prezidentə şikayət edəcək

"Kimə üz tuturam, sənədlərə baxıb deyir ki, qanun səndən yanadır, amma biz merə güldən ağır söz deyə bilmərik"

“Bütün rəsmi qayda-qanunlar, dövlət idarələri, konstitutsiya hüquqları, məhkəmələr öz hökmünü verib. Sadəcə olaraq Hacıbala Abutalıbov qanunla idarə olunan dövlətin qanunlarına əməl etmir. Mer özünü bu ökənin sahibi kimi aparır, reallığı görmür və ya başa düşmür, ya da düşmək istəmir. Çünki kimə üz tuturam, sənədlərə baxıb deyir ki, qanun səndən yanadır, amma biz merə güldən ağır söz deyə bilmərik”.

PİA.AZ xəbər verir ki, bu barədə Modern.az saytına kinorejissor, ssenarist, aktyor Əbdül Mahmudov bildirib.

O, bəzi qurumlarda insanların merdən çox qorxduqlarını deyib:“Bizim məhkəmə orqanlarında çox ləyaqətli insanlar var. Düzdür, əksəriyyət danışanda bu qurumlardan şikayətlənir, amma inanın ki, orda çalışanların hər biri çox obyektiv, ləyaqətli insanlardır. Mənə bildiriblər ki, rəsmi surətdə həbs qoymaq imkanım, merin evini, maşını əlindən almaq ixtiyarım var. Bu işin icrası prezident sərəncamı ilə yaradılan məhkəmə qərarlarının icra strukturlarına tapşırılıb. Onlar isə kağız üzərində hər şey etməyə hazırdırlar, amma deyirlər ki, biz merə qarşı bunu edə bilmərik. Qanunu icra etmədiklərinə görə də mənim hüquqşünaslarım onlar barəsində cinayət işi qaldırılması üçün rəsmi qurumlara müraciət edib. Amma bunun da bir faydası olacağına inanmıram”.

Aktyorun son ümidi prezident İlham Əliyevədir: “Prezidentə müraciət etməyə çalışıram. Qəribəsi budur ki, iki dəfə ölkə başçısına məktub ünvanlasam da, ünvana çatmayıb. Bir az da gözləyirəm, əgər bir nəticə olmasa, mətbuat konfransı keçirib, bütün sənədləri ortaya qoyacağam. Bir-bir ad çəkməklə məni süründürənləri ifşa edəcəm. Mən boş yerə danışmıram, əlimdə o boyda nazirliklərin, qurumların rəsmi sənədləri var. Bir azca külək əsəndə daşlar başımıza uçur, pəncərənin qabağına dirək qoymuşam ki, qırılsa üstümüzə tökülməsin. Anlamıram, daha nə baş verməlidir ki, özündən razı, xalqdan xəbərsiz Hacıbala Abutalıbov məhkəmə qərarını icra etsin. Yəni qanunlarımız merdən aşağıdır?!”

“Qış Parkı”nın tikintisi zamanı Əbdül Mahmudovun evinə ciddi ziyan dəyib. Məhkəmənin qərarına əsasən, Hacıbala Abutalıbov zərər vurulan evi təmir etdirməli, ya da dəyən ziyanı ödəməlidir. Əbdül Mahmudov dəfələrlə keçirilən məhkəmələrdə qalib tərəf olsa da mer məhkəmə qərarlarını icra etməməkdə israr edir.

pia.az