Üç fransız deputat və Avropa Azərbaycanlıları Cəmiyyəti məqalə yazıb; Azərbaycanın Avropa Birliyi üçün önəmi vurğulanır
Qərb ölkələrində fəaliyyət göstərən lobbi təşkilatları arasında Tale Heydərovun rəhbərlik etdiyi Avropa Azərbaycanlıları Cəmiyyətinin (The European Azerbaijan Society (TEAS)) adı tez-tez gündəmə gəlir.
Azərbaycanın dünya arenasında müsbət imicinin formalaşdırılması istiqamətində bu təşkilat xüsusi fəallıq göstərir. Adından da göründüyü kimi, onlar daha çox Avropa ölkələrində təbliğat kampaniyası aparırlar.
İndi diqqətinizə təqdim etdiyimiz bu xəbər də həmin təbliğatın bir nümunəsi kimi diqqət çəkir. Cəmiyyətin “PRWeb” saytında yaydığı xəbərdə deyilir ki, Fransanın aylıq nəşr olunan “La Revue du Trombinoscope” siyasi jurnalı Azərbaycanın Avropa Birliyi üçün strateji əhəmiyyətindən bəhs edən məqalə çap edib. Diqqət çəkən məqam odur ki, məqalə Avropa Azərbaycanlıları Cəmiyyətinin Fransa bölməsinin də qatqısı ilə üç nəfər fransalı deputatın imzası ilə yayımlanıb. Jérôme Lambert (RRDP), Thierry Mariani (UMP) və Jean-Louis Dumont-un (SRC) imza atdığı məqalə “Why is Azerbaijan a key partner for the European Union?” (Nədən Azərbaycan Avropa Birliyi üçün açar tərəf-müqabildir) adlanır.
Yazıda dövrü mətbuatda oxuduğumuz fikirlər bu dəfə fransız deputatların adından səslənir. Müəlliflər Fransanın Qafqazlarda davamlı sülhə nail olmaq üçün gördüyü işlərə vurğu yaparaq Fransa prezidentinin Parisdə Azərbaycan və Ermənistan prezidentlərini bir araya gətirməsinin önəmindən söhbət açırlar. O da vurğulanır ki, bu danışıqların davamı olaraq gələn ilin sentyabrında Azərbaycan və Ermənistan prezidentləri BMT-nin tədbirində yenidən bir araya gələcəklər. (musavat)
Digərxəbərlər
Populyar xəbərlər
