Bu gün Şəki şəhərində 60 gəncin iştirakı ilə “Təmiz Şəhər Naminə” adlı Yay Məktəbinin fəaliyyətinə start verildi
Maarifləndirici düşərgə IDEA (Ətraf Mühit Naminə Dialoq) İctimai Birliyi və “Təmiz Şəhər” ASC tərəfindən təşkil olunur. Sayca beşinci olan yay məktəbində hər il onlarla gənc ətraf mühitin qorunması ilə bağlı nəzəri və əyani məlumatlar əldə edib. Bu il iyunda elan olunmuş layihəyə 500-dən çox gənc elektron ərizə ilə müraciət edib və onların arasından ekoloji ideyaları ilə fərqlənən 60-a yaxın şəxs seçilərək məktəbə dəvət edilib. “Təmiz Şəhər Naminə” Yay Məktəbinin iştirakçıları 22-26 iyul tarixlərində yaşıl iqtisadiyyat və biznes planların hazırlanması üzrə təlimlərdə iştirak edəcək, komandalara bölünərək işgüzar oyun formatında öz aralarında ən yaxşı yaşıl biznes ideyanı müəyyən edəcəklər. Uğurlu ideyaların reallaşdırılması üçün imkan yaradılacaq və təşkilatçılar tərəfindən dəstək göstəriləcəkdir.
Müasir dövrdə ətraf mühitin qorunmasının vacibliyinə xüsusi diqqət verilən layihənin məqsədi gənc nəsli müsbət və davamlı ekoloji dəyişiklik yaratmağa hazırlamaqdır. Yay məktəbində gənclər birlikdə həm dincəlir, həm ətraf-mühitlə bağlı bilgilənir, həm də öz ideyalarını təklif edirlər. Yay Məktəbi “Vətəndaş Cəmiyyətində Debat” İctimai Birliyinin dəstəyi ilə həyata keçirilir.
Digərxəbərlər
Populyar xəbərlər
