Sahib Kərimli AXCP-dən çıxarıldı

AXCP sədri postuna keçmiş namizəd Sahib Kərimli partiya sıralarından çıxarılıb

Modern.az xəbər verir ki, bu barədə Sahib Kərimli özü facebook hesabında məlumat yayıb.

"Deməli, dəfələrlə Əli Kərimlinin təşəbbüsü ilə AXCP Rəyasət Heyətində və Şəki rayon təşkilatında məni partiyadan çıxarmaqla bağlı müzakirələr açılsa da, qərar qəbul etmək mümkün olmamışdı. İndi məlum olur ki, şöbə sədri Facebook profilində qeyd yazıb ki, Şəki şöbəsinin Məclisində guya partiyadan xaric olunmağımla bağlı yekdilliklə qərar qəbul edilib. Bütün saxtakarlıqlar bir tərəfə, təkcə onu qeyd edim ki, Məclis sədri Elsad Hesenovla əlaqə saxladım, onun bu qərardan xəbəri yoxdur”.

Sahib Kərimli qeyd edib ki, AXCP sədri Əli Kərimli 2018-ci ilə kimi ona tanıdığı zamanı gözləməyə cəsarət etməyib, ictimai rəyi nəzərə almadan partiya daxilində alternativ fikri saxta və antidemokratik yolla susdurmaq yolunu tutub:

"Bəyan edirəm ki, qanuni yollarla bu qərarın saxta olduğunu sübut edəcəyəm, partiya üzvlüyümü bərpa edib, 2018-ci ildən sonra Əli Kərimlinin istefasına nail olub, demokratik qurultay keçirilməsini təmin etmək üçün sistemli fəaliyyətə başlayacağam.

Hələlik isə Əli Kərimli partiya üzvlərini və cəmiyyəti aldatmaqla məşğul olsun, zaman onun əleyhinə işləyir. Qərara qarşı bu gün başlayacağım fəaliyyəti öz lehinə çevirib, ictimai rəyi yenidən çaşdırmasına imkan verməyəcəyəm. Bu qədəri ilə hələlik kifayətlənirəm.

Buyurun Əli Kərimli, cəmiyyətdə ciddi sosial problemlər var, hakimiyyətdən narazılıq üst səviyyədədir və partiya daxilində sizə mane olan yoxdur. 2018-ci ilin prezident seçkiləri şansınız var. Bacarmayacağınız təqdirdə istefa verməlisiniz”.

pia.az