Bakı Apelyasiya Məhkəməsində dələduzluqda ittiham olunan sabiq hakim Həsən Əliyevin apelyasiya şikayəti üzrə məhkəmə prosesi başlayır
Virtualaz.org saytına bu barədə Bakı Apelyasiya Məhkəməsindən məlumat verilib. Məhkəmə prosesi mayın 27-nə təyin olunub.
Xatırladaq ki, Gəncə Ağır Cinayətlər Məhkəməsinin hökmü ilə Həsən Əliyev 7 il, Elman Məmmədov 8 il, Taleh Süleymanov isə 7 il müddətinə azadlıqdan məhrum ediliblər. Sabiq hakim məhkəmə zalında həbs olunub.
Qeyd edək ki, 2007-2014-cü illərdə Bakı Ağır Cinayətlər Məhkəməsində hakim işləyən Həsən Əliyevin səlahiyyətlərinə ölkə başçısı İlham Əliyevin sərəncamı ilə ötən ilin fevral ayında xitam verilib.
Təxminən 5 ay sonra isə uzun illər prokurorluq və məhkəmə orqanlarında çalışan H.Əliyevə qarşı Cinayət Məcəlləsinin 178.3.2 (külli miqdarda ziyan vurmaqla dələduzluq törətmə) və 312.2-ci (rüşvət vermə) maddələri ilə ittiham irəli sürülüb və barəsində başqa yerə getməmək haqqında iltizam qətimkan tədbiri seçilib.
Ramazan Səlimov
Buna səbəb Ramazan Səlimov adlı şəxsin iddiası olub. R.Səlimov iddia edib ki, sabiq hakim ondan vəzifəyə düzəltmək vədi ilə 600 min manat pul alaraq qaytarmayıb.
İstintaq materiallarına görə, Həsən Əliyev Bakı Ağır Cinayətlər Məhkəməsində hakim işləyərkən Ramazan Səlimov adlı şəxsə vəzifədə olan tanışları vasitəsilə onu icra başçısı təyin etdirəcəyi barədə vəd verib. Bu işin müqabilində Ramazan Səlimovdan 1 milyon dollar (800 min manat) istənilib. İş materiallarından belə aydın olur ki, pulun böyük hissəsi əvvəlcədən verilib. Belə ki, Həsən Əliyev R.Səlimovdan 2011 və 2012-ci illərdə hər dəfə 300 min olmaqla iki dəfəyə ümumilikdə 600 min manat alıb. Bildirilib ki, qalan 200 min manat da sərəncam imzalanandan sonra verilməlidir.
Sabiq hakim isə ona qarşı irəli sürülən bu ittihamlarla nə istintaq, nə də məhkəmə dövründə razılaşmayıb. Bunun ona qarşı qurulan oyun olduğunu deyib.
pia.az