“İş günümü mətbuat ilə tanışlıqdan başlayıram. Təzə qəzetləri oxumaqla, yerli saytları gözdən keçirməklə, Azərbaycanda baş verən hadisələr barədə informasiya alıram”
Bu fikirləri Rusiya Federasiyasının Azərbaycandakı səfiri Vladimir Doroxin Rusiya İnformasiya və Mədəniyyət Mərkəzinin (RİMM) Azərbaycan Milli Mətbuat Günü münasibətilə təşkil etdiyi görüşdə söyləyib.
Səfir deyib ki, informasiyanın dürüst və obyektiv olmasında çox maraqlıdır. O, səfirliyin fəaliyyətinin, Rusiya-Azərbaycan münasibətlərinin işıqlandırılmasına görə jurnalistlərə təşəkkür edib.
Bakının və Azərbaycanın arxiyepiskopu Aleksandr İşşein tədbirdə çıxış edərək, Azərbaycan jurnalistikası nümayəndələrini 140 illik yubiley münasibətilə təbrik edib. O, Azərbaycan mətbuatında dinlərarası münaqişələrə təhrik edən məqalələrin olmamasına görə təşəkkür edib. Azərbaycanı tolerant ölkə adlandıran arxiyepiskop deyib ki, burada bütün xalqların və dinlərin nümayəndələri bir ailə kimi sülh və əmin-amanlıq şəraitində yaşayır. Arxiyepiskop xüsusi vurğulayıb ki, Azərbaycan KİV-ləri ölkədə dini durumu obyektiv işıqlandırır, təkcə müsəlmanların deyil, həm də başqa dinlərin nümayəndələrinin dini həyatına diqqət yetirirlər.
“Rossotrudniçestvo” agentliyinin Azərbaycandakı nümayəndəliyinin rəhbəri Valentin Denisov Azərbaycan mətbuatı nümayəndələrini 140 illik yubiley münasibətilə təbrik edərək, birgə fəaliyyətə, nümayəndəliyin və RİMM-in fəaliyyətinin işıqlandırılmasına görə onlara təşəkkür edib. O, “Rossotrudniçestvo” nümayəndəliyinin və RİMM-in fəaliyyətinin işıqlandırılmasında fəal və səmərəli fəaliyyətinə görə bəzi KİV-lərin kollektivinə Azərbaycan milli mətbuatının 140 illiyi ilə əlaqədar təşəkkür məktubları təqdim edib.
Sonra görüş konsert və çay süfrəsi arxasında səmimi söhbət ilə davam edib. (azərtac)
pia.az