Rusiya əhalisinin real gəlirləri bu ilin sentyabr ayında 2,8% azalıb.
"Report" "Gazeta.ru" saytına istinadən xəbər verir ki, azalma ardıcıl 24 aydır davam edir. Real gəlirlərin azalması fonunda ölkədə tələb azalaraq pərakəndə malların dövriyyəsinin dayanıqlı düşməsinə səbəb olub. Beləliklə, ölkə iqtisadiyyatı özünəməxsus "spiral" mühitinə daxil olub. Bu vəziyyətdən çıxış üçün ekspertlər, hökümətin biznesə dəstək verməsini gözləyir.
Sentyabrda əhalinin maaşlarının bir miqdar artrması və tələbin yüksəlməsinə baxmayaraq, əhalinin real gəlirləri keçən ilin analoji dövrü ilə müqayisədə 2,8% azalıb. İlin əvvəlindən isə əhalinin real gəlirləri 5,3% azalıb.
Üçüncü rübdə isə əhalinin real gəlirləri keçən ilin analoji dövrü ilə müqayisədə 6,1% azalma göstərib. Analitiklər hətta 2009-cu il böhranı zamanı real gəlirlərin 2008-ci illə müqayisədə belə kəskin olmadığını, yalnız 3,3% azaldığını bildiriblər. Buna səbəb kimi, ölkədə pensiyaların real həcminin azalması göstərilib. Pul vəsaitlərinin xərclənməsinin strukturunda 2016-cı ilin avqustunda keçən ilin analoji dövrü ilə müqayisədə mal və xidmətlərə çəkilən xərclərin xüsusi çəkisi artıb. Belə ki, bu göstərici 71,3%-dən 75,3% -ə çatıb. Bununla da yığım səviyyəsi 13,7%-dən 8,6%-ə enib.
Malların pərakəndə dövriyyəsi isə sentyabr ayında 2,4 trln. rubl (38 mlrd. ABŞ dolları) təşkil edib ki, bu da keçən ilin analoji dövrü ilə müqayisədə 3,6% azdır. İlin əvvəlindən azalma isə daha böyükdür - 5,4%. Gələcəyə inamın azalması tələbin daha da kəskin azalmasına və bunun da öz növbəsində pərakəndə satışları azaldaraq qiymətləri artırmasına gətirib çıxarır. Nəticədə iqtisadi fəallıq zəifləyir.
pia.az
Digərxəbərlər
Populyar xəbərlər
