Rusiya Qarabağ münaqişəsinin həllində niyə təşəbbüsü ələ alıb?

Rusiya Qarabağ münaqişəsinin həllində niyə təşəbbüsü ələ alıb? – Həmsədrdən açıqlama

"Bu, bir sirr deyil. Hamı bilir ki, Dağlıq Qarabağ münaqişəsinin həllində Rusiya əsas rol oynayır".

Bunu ATƏT-in Minsk Qrupunun amerikalı həmsədri Riçard Hoqland Bakıda keçirdiyi mətbuat konfransında deyib.

O bildirib ki, həmsədr dövlətlər Dağlıq Qarabağ münaqişəsinin sülh yolu ilə həlli istiqamətində birgə çalışırlar. Həmsədr bildirib ki, 25 ildir danışıqlar aparılsa da, Qarabağ problemi həll edilməyib.

"Lakin deyə bilərəm ki, bu diplomatik danışıqlar bir çox zorakılığın qarşısını ala bilib. Yenidən diplomatik mühit yaradılmalıdır ki, tərəflər razılığa gəlsin"-deyə, o, qeyd edib.

Onun sözlərinə görə, tərəflər siyasi iradə nümayiş etdirməli və razılığa gəlməlidir. Hoqland cəbhədə son zamanlar baş verən toqquşmaların hamını narahat etdiyini bildirib. O, Rusiyanın münaqişənin həllində aparıcı rola malik olmasında toxunub və fikrini belə əsaslandırıb:

"Bilirsiniz ki, zaman-zaman həmsədrlərdən hansısa aparıcı rola malik olub. Bir zamanlar Amerika, sonra isə Fransa təşəbbüsü ələ almışdı. Rusiyanın xarici işlər naziri Sergey Lavrov isə son zamanlar deyir ki, Rusiya aparıcı rol oynayır. Rusiya da daxil olmaqla, həmsədr dövlətlər münaqişənin sülh yolu ilə həllinin tərəfdarıdır".

pia.az