Prezidentlərin Cenevrə görüşünün fiaskosu - Cəbhədə gərginlik artır

Konfliktoloq: “Ermənistan danışıqlara, hətta bu danışıqların imitasiyasına maraqlı deyil”

“Cenevrə görüşü 2016-ci il aprel ayından sonra tərəfləri stol arxasına oturtmaq üçün edilmiş bir cəhd idi”.

Bu sözləri Cenevrə görüşündən sonra cəbhədə artan gərginliyi şərh edərkən konfliktoloq Əvəz Həsənov PİA.AZ-a açıqlamasında qeyd edib.

Məlumdur ki, oktyabrın 16-da İsveçrənin Cenevrə şəhərində Azərbaycan prezidenti İlham Əliyev və Ermənistan prezidenti Serj Sarkisyan arasında görüş keçirilib. Prezidentlər danışıqlar prosesini intensivləşdirmək üçün tədbirlər görməyə və təmas xətti boyunca gərginliyi azaltmaq üçün əlavə addımlar atmağa razılaşıblar.Həmsədrlər çox uzun fasilədən sonra baş tutan bu birbaşa danışıqlardan razılıq ifadə ediblər.

Prezidentlərin Cenevrə görüşündən sonra isə cəbhədə gərginlik daha da artıb. Halbuki, Cenevrə görüşündə əldə olunan tək razılıq tərəflərin cəbhədə gərginliyi azaltması ilə bağlı idi. Oktyabrın 22-də Ermənistan silahlı qüvvələrinin bölmələri tərəfindən atəşkəs rejiminin pozulması nəticəsində Silahlı Qüvvələrimizin hərbi qulluqçusu əsgər Zeynalov Cabbar Firuddin oğlu şəhid olub. Bununla bağlı Müdafiə Nazirliyi məlumatında bildirilir ki, cəbhə xəttində baş vermiş düşmən təxribatına görə bütün məsuliyyət Ermənistanın kriminal hərbi-siyasi rəhbərliyinin üzərinə düşür:

“Son günlər Ermənistan hakimiyyətinin müxtəlif təbəqələrdən olan nümayəndələri, o cümlədən bu ölkənin xarici işlər naziri Edvard Nalbandyan guya Azərbaycan tərəfinin açdığı atəş nəticəsində erməni hərbi qulluqçusunun həlak olması barədə yalan və iftira dolu fikirlər səsləndiriblər. Həlak olan erməni hərbçisinin düşmən ordusunda tüğyan edən cinayətkarlıq nəticəsində öz xidmət yoldaşının açdığı atəşdən öldüyünü təsdiq edən məlumatların yayılması bu iddiaların əsassız olduğunu bir daha sübut edir.

Bu cür üzdəniraq və məsuliyyətsiz bəyanatlar verməklə Ermənistan rəhbərliyi beynəlxalq ictimaiyyət və erməni xalqında qoşunların qarşıdurma xəttindəki vəziyyət barədə yanlış fikir formalaşdırmağa, törətdikləri təxribatlara haqq qazandırmağa və cavabdehlikdən yaxa qurtarmağa cəhd göstərir. Müdafiə Nazirliyi bildirir ki, cəbhə xəttində baş vermiş düşmən təxribatına görə bütün məsuliyyət Ermənistanın kriminal hərbi-siyasi rəhbərliyinin üzərinə düşür”.

Cenevrə görüşündən sonra cəbhə bölgəsində gərginliyin artmasının səbəbi nədir və gərginliyin artmasında Ermənistanın hansı maraqları ola bilər?

Mövzu ilə bağlı PİA.AZ-ın əməkdaşı konfliktoloq Əvəz Həsənovun fikirlərini öyrənib.

Əvəz Həsənov: “Ermənistan Azərbaycana qarşı yumşalmış heç bir yanaşmanın olmadığını nümayiş etdirmək istəyir. Bu, Sərkisyan klanının hakimiyyətdə qalmaq şansını artırır”.

Cenevrə görüşünün formal xarakterli olduğunu qeyd edən konfliktoloq Əvəz Həsənova görə, bu görüş cəbhədəki gərginliyi azaltmaq iqtidarına malik deyil:

“Düşünmürəm ki, Cenevrə görüşündə ciddi razılaşmalar əldə olunub. Sadəcə olaraq Cenevrə görüşü 2016-ci il aprel ayından sonra tərəfləri stol arxasına oturtmaq üçün qurulmuş bir cəhd idi. Hətta hansısa razılaşma belə varsa, bu, formal xarakterlidir. Azərbaycan tərəfi Ermənistanı danışıqlar prosesinə qaytarmaqda maraqlı idi, amma Ermənistan danışıqlara, hətta bu danışıqların imitasiyasına maraqlı deyil. Ona görə də cəbhə bölgəsində gərginlik yenə də artacaq və gərginliyin azalması üçün ciddi bir əsas da yoxdur. Prezidentlərin Cenevrədə görüşməsi və müəyyən fikir mübadiləsi aparmasına baxmayaraq, Ermənistan buna əhəmiyyət vermir. Bu baxımdan ciddi bir irəliləyişin olacağını gözləmirəm.

Qeyd edim ki, gələn ilin mart ayında Ermənistanda prezident seçkiləri keçiriləcək. Ermənistan tərəfi maraqlıdır ki, bu seçkilərdə radikal və aqressiv əhval-ruhiyyənin olduğunu göstərsin. Yəni, Azərbaycana qarşı yumşalmış heç bir yanaşmanın olmadığını nümayiş etdirmək istəyir. Bu, Sərkisyan klanının hakimiyyətdə qalmaq şansını artırır. Cəbhədə baş verən gərginliyin kimlər tərəfindən və niyə edildiyi barədə hələki, qəti fikir söyləmək çətin olar”.

Gülşən ŞƏRİF

pia.az