Prezident Ziya Məmmədovun doğulduğu rayona getdi – Nəqliyyat naziri yenə üzə çıxmadı
Xəbər verildiyi kimi, oktyabrın 6-da Azərbaycan Respublikasının Prezidenti İlham Əliyev Ucar və Göyçay rayonlarında olub, yenidən qurulan Göyçay-Ucar avtomobil yolunun açılışında iştirak edib, həmçinin hər iki rayonda son vaxtlar aparılan abadlıq-quruculuq işləriylə yaxından tanış olub.
Qeyd edək ki, bu gün də ölkə mətbuatının diqqət kəsildiyi məsələlərdən biri Ucarda doğulan və Göyçay-Ucar rayonlarına qeyri-rəsmi “kuratorluq” edən Nəqliyyat naziri Ziya Məmmədovun bu səfər ərəfəsində Prezidentin ətrafında görünüb-görünməyəcəyi idi.
Bəlkə də bu səbəbdən idi ki, Prezidentin Ucar və Göyçaya səfərləri barədə rəsmi agentliklər xəbər yaysalar da, aradan saatlarla vaxt keçməsinə baxmayaraq, açılış mərasimlərindən hər hansı fotoşəkil və videokadrlar yayımlanmırdı.
Azərbaycan Dövlət Televiziyasının Göyçay-Ucar avtomobil yolunun açılış mərasimindən axşamüstü yaydığı kadrlarda isə Ziya Məmmədov bu dəfə də gözə dəyməyib....
Xatırladaq ki, rəsmi olaraq Ziya Məmmədovun məzuniyyətdə olduğu bildirilir, qeyri-rəsmi mənbələr isə Nəqliyyat nazirinin məzuniyyətini Ucarda – doğma Qazıqumlaq kəndində keçirdiyini söyləyirlər. Hətta ölkə qəzetlərində Nəqliyyat nazirinin dünən Ucar və Göyçayda camaat arasına çıxdığı, bazarlıq etdiyi, ehtiyacı olanlara pul payladığı haqda informasiya da verilmişdi.
Belə görünür ki, Ziya Məmmədov Prezidentin bölgəyə səfərindən öncədən məlumatlı olub və əhalinin ondan şikayətçi düşməməsi üçün qabaqcadan özü barəsində "qayğıkeş", "camaata əl tutan" obrazının yaradılmasına hesablanmış jestlər edib.(strateq.az)
pia.az