Jurnalist və hüquq müdafiəçisi Pərviz Həşimlinin kassasiya şikayətinə noyabrın 12-də Ali Məhkəmədə baxılacaq
Bu barədə Bizimyol.info saytına jurnalistin vəkili Fariz Namazlı məlumat verib. Vəkilin sözlərinə görə, Bakı Ağır Cinayətlər Məhkəməsinin hökmündən verilimiş apellyasiya şikayəti üzrə ilkin baxış iclasında şikayətə məhkəmə istintaqı ilə baxılması, həbs-qətimkan tədbirinin dəyişdirilməsi və digər vəsatətlər versələr də, məhkəmə təmin etməyib. Bu səbəbdən də Apellyasiya Məhkəməsinin ilkin baxış qərarından Ali Məhkəməyə kassasiya şikayəti veriblər. Ali Məhkəmənin qərarından sonra Bakı Apellyasiya Məhkəməsində baxış davam etdiriləcək.
Vəkil Fariz Namazlı əlavə edib ki, Pərviz Həşimliyə Bakı İstintaq Təcridxanasında ailə üzvləri ilə yalnız şüşə arxasından görüşə icazə verildiyi üçün, o, açıq görüş verilməsi üçün bir neçə dəfə müxtəlif instansiyalara müraciət etsə də, problem həllini tapmayıb.
Pərviz Həşimli Təvəkkül Qurbanov adlı şəxslə 2013-cü il sentyabrın 17-də Milli Təhlükəsizlik Nazirliyinin keçirdiyi əməliyyatla saxlanılıb. Onlara qarşı odlu silahın və döyüş sursatının qaçaqmalçılığı və odlu silah saxlama maddələri ilə ittiham irəli sürülüb. Pərviz Həşimli ittihamları qəbul etmir, T.Qurbanovun MTN-in adamı olduğunu deyərək, onun vasitəsilə şərləndiyini və siyasi sifarişlə, saxta ittihamla həbs edildiyini bəyan edib. Lakin Bakı Ağır Cinayətlər Məhkəməsinin 15 may 2014-cü il tarixli hökmü ilə Pərviz Həşimli 8 il, Təvəkkül Qurbanov isə 8 il 6 ay müddətinə azadlıqdan məhrum ediliblər.
Digərxəbərlər
Populyar xəbərlər
