18 noyabr 2014- cü ildə Demokratiya və İnsan Haqları Mərkəzində əməkdaşlıq edən siyasi partiyaların (KAXCP, ADP, BAP, Azadlıq, VİP, Aydınlar, ALDP, AXP) sədrlərinin iştirakı ilə növbədənkənar toplantı olub. Musavat.com xəbər verir ki, toplantıda siyasi partiya sədrlərinin 19 noyabr 2014- cü il tarixdə Prezident Administrasiyası, Ali Məhkəmə və Baş Prokurorluq binaları qarşısında piket keçirmələri xəbərdarlığına BŞİH-in mənfi cavabı ilə bağlı vəziyyət müzakirə edilib
BŞİH-in qadağası qanunsuzluq və ölkədə sərbəst toplanma azadlığının növbəti pozulması faktı kimi dəyərləndirilib.
11 siyasi partiya sədrinin siyasi məhbuslara azadlıq şüarı ilə piket keçirmək niyyəti ətrafında geniş informasiya axınının getməsi və hakimiyyətin piketi qadağan etməsi siyasi məhbus probleminə və sərbəst toplanma azadlığına diqqətin cəlb edilməsi baxımından aksiyanın qismən də öz məqsədinə nail olduğu hesab edilib. Eyni zamanda aksiyanın BŞİH ilə razılaşdırılacağı təqdirdə keçirilməsi barədə partiya sədrlərinin mövqeləri nəzərə alınaraq 19 noyabr aksiyasının təxirə salınması məqsədəuyğun salınıb. Siyasi məhbuslara azadlıq tələbi ilə kütləvi aksiyalar keçirməyin gündəmdə saxlanması lazım bilinib.
Daha sonra DİHM- də əməkdaşlıq edən bir sıra partiya rəhbərlərinin PA-nın şöbə müdiri Əli Həsənovla görüş üçün müraciəti ilə bağlı məsələ barədə məlumat dinlənilib. ALDP sədri Fuad Əliyev və Azadlıq Partiyasının sədri Əhməd Orucun ABŞ səfirliyindəki görüşü barədə məlumat dinlənilib. (musavat.com)