Oqtay Gülalıyevdən Mehriban Vəzirin ittihamlarına cavab

Xəbər verdiyimiz kimi Milli Şuranın bu gün keçirilən Koordinasiya Mərkəzinin iclasında, yazıçı-publisist Mehriban Vəzir şura üzvlüyündən çıxarılıb

M. Vəzir məsələ ilə bağlı musavat.com-a açıqlamasında Ümumi Şuraya üzv seçilən Oqtay Gülalıyevin adını hallandıraraq, onu Milli Şura rəhbərliyinə yalan məlumat verməkdə ittiham edib.

Məsələ ilə bağlı Oqtay Gülalıyevin də fikirlərini aldıq. O. Gülalıyev musavat.com-a bildirdi ki, Mehriban Vəzirin Milli Şura üzvlüyündən çıxarılması ilə bağlı qərar artıq verilib:

“Bu baxımdan əlavə deyəcək bir sözümüz də yoxdur. Milli Şuranın qərarı ortadadır. O necə düşünürsə, bu, onun öz hüququdur. Onun fikirlərinə də hörmət edirəm. Ancaq qeyd etdiyim kimi Milli Şura bu məsələni müzakirə edib və müvafiq qərarını verib. Bütün məsələlər ətraflı şəkildə müzakirə edilib. Sadəcə olaraq mən, həmin qərarlar haqqında danışmaq istəmirəm. O özü daha yaxşı bilir ki, bu qərar nə üçün və necə qəbul olunub”.

Mehriban Vəzirin açıqlama tələb etdiyi 400 min vəsaitə gəlincə isə O. Gülalıyev aşağıdakıları bildirib:

“Hesab edirəm ki, bağlı qrupda yazılan və deyilən fikirlər kənar müstəvilərdə müzakirə olunmamalıdır. Kimsə onu müzakirəyə çıxarırsa, bu, onun öz məsuliyyətidir”.

Qeyd edək ki, M. Vəzir məsələ ilə bağlı musavat.com-a açıqlamasında bildirib ki, hər şey Oqtay Gülalıyevin Milli Şura rəhbərliyinə ünvanladığı müraciətdən qaynaqlanıb. Onun sözlərinə görə, O. Gülalıyev, İctimai Birliklərin Mədən Sənayesində Şəffaflığın Artırılması (MSŞA) Koalisiyasının 18-ci ümumi yığıncağından sonra Milli Şura rəhbərliyinə ünvanlandığı elektron məktubda bildirib ki, bütün müqavimətə, anti- təbliğata, ayrılan 400 min manata baxmayaraq hakimiyyət Şura və Monitorinq Qrupu seçkilərində məğlubiyyətə uğradı. M. Vəzir bildirib ki, Koalisiyanın Şura üzvü, eyni zamanda sabiq koordinatoru Əliməmməd Nuriyevdən bu məsələ ilə bağlı izahat tələb etdiyi halda, onu Milli Şuradan çıxarıblar.

pia.az