Elsevər Ağayev 20 Yanvar əlilini “burada küçə söhbətlərini etməyin” cavabıyla heyrətləndirib...
1990-cı ilin 20 yanvar faciəsindən 25 il ötməsinə baxmayaraq, xeyli sayda soydaşımız o qanlı hadisələrin yaralarını, ağrı-acılarını günümzdə də canlarında daşımaqdadırlar.
Həmin məşum gecənin qurbanlarından biri də iki güllə yarası almış 20 yanvar əlili Cavid Abdullayev olub. Cavid müasir tariximizə xalqımızın qəhrəmanlıq səlnaməsi kimi yazılan o günləri belə xatırlayır:
“Mən 1988-ci ildə meydan hərəkatı başlayanda noyabrın 17-dən dekabrın 5-nə qədər meydanda olmuşam. O vaxt indiki İqtisad Unversitetinin tələbəsi idim və tələbələr Milli Azadlıq mübarizəsinin əsas aparıcı qüvvəsi idi. Qarabağ uğrunda başlayan mübarizə 1989-cu ilin sonlarına yaxın müstəqillik uğrunda Milli Azadlıq hərəkatına çevrildi. Həmin vaxtlar bizim mübarizəmiz nəticə vermək üzrə idi, lakin imperiya isə bunu qəbul edə bilmirdi. Ona görə də, müxtəlif bəhanələrlə ordunu Bakıya yeridib hərəkatı boğmaq istəyirdi. Bəhanəni də, o vaxt kənardan respublikaya gətirilmiş xüsusi təyinatlı qruplar və yerli təhlükəsizlik orqanları bir neçə ermənini öldürməklə onlara təqdim etdi. Biz tələbələr bunun qarşısını almaq istəyərkən hətta bizi də şantaj edərək “onlar da ermənidir” deyərək üzərimizə hucum edirdilər. Sənədlərimizi təqdim etməklə əllərindən çətinliklə qurtara bilirdik”.
C.Abdullayevin sözlərinə görə, imperiya qüvvələri yaratdıqları bəhanəni əsas edərək ordunu Bakıya yeritməyə başladı. Bunun qarşısın almaq üçün Bakıda Müdafiə Komitəsi təşkil olunanda Cavidgilin institutunda da komitənin yerli şöbəsi təsis edilib. Tələbələr bir neçə gün şəhərin müxtəlif yerlərində növbə çəkərək ordunun şəhərə girişinə imkan verməyiblər. C.Abdullayev xatırlayır ki, həmin gecə Salyan kazarmasının Tbilisi prospektinə çıxışından tankların şəhərə çıxmasının qarşısını bir necə dəfə ala biliblər, hətta tanklar şəhərə gecə saat 12:30-da çıxmaq istəyəndə də imkan verməyiblər. “İki saatdan sonra keçmiş Avtovağzal və XI Qızıl Ordu meydanı, kazarma və kazarma ilə üzbə-üz “gecə tikilən evlər” deyilən istiqamətlərdən eyni vaxtda üzərimizə hücuma keçdilər. Bir tələbə yoldaşım güllə yarası alaraq yerə yıxılmışdı. Mən onu sürüyərək tankların altından çıxarmaq istəyərkən güllə yağışına tuş gəldim. Birinci güllə əlimdən dəydi, sonra ani sürətdə sifətimdən ikinci güllə dəydi. Mən yerə yıxıldım, bu vaxt başımın arxa nahiyəsindən avtomatın qundağı ilə bir neçə zərbə vurdular. Qəribə burasındadır ki, bütün bu dediklərimi 3 ildən sonra xatırlamışam. O vaxta qədər heç kimi və heç nəyi xatırlamırdım.
Həkimlər ağır güllə yarası almış C.Abdullayevə ağır qarışıq kəllə-beyin zədələnməsi, beyin oturacaq sümüyünün qırığı, beyində subarxanadial hissəyə qan sızması, sağ üz sinirinin nevriti, sol goz sinirinin atrofiyası, aşağı və yuxarı çənə sümüklərinin və almacıq sümüyünün sınığı diaqnozunu qoyurlar. Bir il fasiləsiz Bakıda mualicə olunduqdan sonra, 1991-ci ildə Türkiyədə baş beyin nahiyyəsindən əməliyyat olunub və 7 ay orada nevroloji müalicə alıb. Türkiyədən qayıtdıqdan sonra səhhəti yenidən ağırlaşan C.Abdullayev 1992-ci ilin ikinci yarısında dövlət hesabına ABŞ-a müalicəyə göndərilib. Onun dediyinə görə, ilk yoxlamalar Vaşinqtonda aparılıb:
“Ancaq müalicə və əməliyyatdan imtina etdilər. Dedilər ki, müalicəyə gecikdiyimə görə müalicə mümkün deyil, yəni güllə ilə bədənə keçmiş zəhər artıq beyinin alt qatına nüfuz etmişdir. Sonra məni Mayamidəki 6 müxtəlif xəstəxanada da müayinə edərək Vaşinqitonda deyilənləri bir daha təsdiqlədilər və Los-Anceles şəhərinə xüsusi ixtisaslaşmıs xəstəxanaya təkrar müayinəyə göndərdilər. Burada bas-beyin nahiyəsindən əməliyyat olundum, ağır və uzun surən əməliyyatdan sonra beyindəki zəhəri təmizləsələrdə göz, qulaq və burunda olan problemləri, başımda olan şiddətli ağri və səsi aradan qaldıra bilmədilər. ABŞ-da 6 ay həkim nəzarətində oldum və sonra ölkəmizə qayıtdım. 7-8 ay nisbətən yaxşılaşsam da yenidən bütün səs və ağrılar daha da şiddətlənməyə başladı...”
25 ildir ki, başındakı şiddətli ağrıdan və səsdən bir dəqiqə olsun belə rahatlıq tapa bilməyən C.Abdullayev ağrılarının sutka ərzində cəmi bircə dəqiqə fasilə verərsə böyuk səbirsizliklə həmin dəqiqəni gözlədiyini deyir. Amma bu baş vermir, o şiddətli ağrılarına görə hər 45 gundən bir 15 gün müalicə olunur: “Bir dəfə mualicəmi buraxmışdım, nəticədə yaddaşım tamam itmişdi. Hazırda müalicə olunmaq imkanlarım da azdır. Ev, ailə qayğıları da bir yandan buna imkan vermir. Cəmi aldığım pul əlilliyə görə 157 manat və Prezidentin təyin etdiyi 130 manat təqaüddür. Mənsə hər 45 gundən bir onların cəmindən 6 dəfə cox mualicəyə pul xərcləyirəm”.
Bütün bunlar Cavidin aldığı yaraların, mənəvi sarsıntıların yekunu deyil. Məsələn, o institututu bitirərkən təyinatını maliyyə nazirliyinə alsa da, bir gün olsun belə doğma iş yerinə çıxa bilməyib. Çünki həkimlər sutka ərzində bir saatdan artıq zehni işlə məşğul olmağı Cavidə qadağan edib. 1993-cü ildən 22 ildir gənc mıtəxəssis və ikinci qrup 20 yanvar əlili kimi Səbail rayonunda ev növbəsində olmasına baxmayaraq hələ də evlə təmin olunmayıb. “Bu günə qədər uşaqlar kiçik olduğundan 2 otaqlı mənzildə birtəhər kirayə qalırdım, kirayə haqqı nisbətən az idi. Hazırda 3 otaqlı mənzildə yaşayıram və ayda 400 manat kirayə pulu ödəyirəm. Tələbəlik illərimi milli azadlıq hərəkatına necə sərf etdiyimi, bu yolda sağlamlığımı necə qurban verdiyimi, yaralanmamısdan əvvəl hansı savada və hafizəyə sahib olduğumu və sonra butun bunları necə itirdiyimi kimlər bilməsə də, axı Əmək və Əhalinin Sosial Müdafiəsi naziri, mənim keçmiş müəllimim Səlim Müslümov çox yaxşı bilir. Çünki tələbəlik illərində mənim ən hörmət etdiyim müəllimlərimdən biri olan Səlim müəllim bu olayların birbaşa şahididir. Açığı, ona həm müəllimim kimi, həm də vətəndaşlara layiqincə xidmət etməyi bacaran bir vicdanlı məmur kimi böyük hörmətim var. Bu günlərdə Səlim müəllimlə görüşəndə də bu qənaətimdə haqlı olduğum öz təsdiqini tapdı. Məni çox gözəl qarşılayan Səlim müəllim problemlərlə şəxsən özü tanış olandan sonra birinci mualicəmi təşkil etməyi, ilin sonuna kimi isə ev məsələmi yoluna qoyacağına söz verdi. Doğrusu, onun bu vədi mənim ürəyimdə ümidləri xeyli artırdı. Səlim müəllim onunla yenidən əlaqə saxlamaq üçün köməkçisi İqbalın və icra aparatının rəhbəri Əjdərin (soyadlarını bilmirəm-C.A.) telefon nömrələrini mənə verdi və onlara mənə köməklik etmələrini tapşırdı. Lakin nazirin köməkcisi ikinci zəngimdən sonra telefonuma cavab vermədi, İcra aparatının rəhbəri Əjdər isə mənə rədd cavabı verdi.
Qeyd etmək istəyirəm ki, Səhiyyə nazirliyinin xaricdə mualicə olunmaq üçün xüsusi komissyası mənə Almanyanın Münhen şəhərində yerləşən xüsusi ixtisaslaşmış əsəb xəstəxanasında mualicə olunmağım üçün rəy verib. ƏƏSMN-i isə ancaq yol pulunu təklif edir. Daha sonra 14 həftə ardıcıl Səlim müəllimin qəbuluna yazılsam da yuxarıda adlarını çəkdiyim aşağı ranqlı məmurlar məni qəbula buraxmadılar.
Tutalım ki, ƏƏSMN ancaq yol pulunu ödəyə bilər. Ancaq mən belə düşünürəm ki, bu problemi səhiyyə naziri O. Şirəliyevlə, yaxud da Neft Şirkəti ilə həll etmək çətin deyildir. Onlar məni tanımasalar da, hörmətli Səlim müəllim məni yaxşı tanıyır ki. Səlim müəllim, kimlərəsə zəng edib bu işi təşkil etmək Sizin şəxsi işiniz deyil ki, utanıb çəkinəsiniz”.
C.Abdullayev həm də gileylənir ki, Moskvanın əlindən sərvətlərimizin alınıb ölkəmizə qaytarılmasında gəncliyimizi, sağlamlığımızı qurban verərək böyük əziyyətlər çəkmişik. Bizim qanımızı tökərək Bakıya daxil olan tanklar il yarımdan sonra ölkəmizi birdəfəlik tərk edib. Bizim tökülən qanımız nəinki ölkəmizin, hətta sosializimdən əziyyət çəkən bir sıra xalqların da azad olmasında əsas baza oldu. Alıb ölkımizə qaytardığımız o sərvətlərdən bizə ev verməyiniz bir yana, müalicə olunmağımızı da bizə qıymırsınız? Səhiyyə nazirinin müavini Elsevərlə görüşüb bu məsələlərdə kömək etməsini xahiş edəndə, dövlət tərəfindən müalicə olunmaq haqqımız var deyəndə nazir müavinindən “burada küçə söhbətlərini etməyin” kəlməsini eşitmək dəhşətli haldır: “Başımdakı dəhşətli ağrı və səslər 25 ildir bir dəqiqə də olsun belə dayanmayıb. Mənim bu çəkdiklərimə biganə qalanlara bu dəhşətli ağrıları arzulamıram. Allah eləməmiş 1-cə saat bu cür ağrıları olsa, 25 ildə nələr çəkdiyimi yaxşı anlayarlar. Sual vrə bilərsiniz ki, niyə bircə saat belə onlara mənim ağrılarımı çəkməyi qıymıram? Çünki mən milli azadlıq mübarizəsinə milli dərklə başlamışam. Dövlətdən də haqqımı tələb edirəm. Eyni zamanda müstəqillik uğrunda mübarizə apardığıma görə kiminsə boynuna minnət qoymuram, bu mənim borcum idi, bu yolda şəhid də ola bilərdim, necəki yüzdən çox şəhid verdik. Ancaq mənim anlamadığım, bu yolda xəsarət almış, sağlamlığını itirmiş insanlara uğrunda vuruşduğu millətin məsul şəxslərinin laqeyd münasibətidir, Moskvadan geri qaytardığımız milyardlardan müalicəmiz üçün qəpik-quruşu bizə qıymamalarıdır. Bəlkə bu qınağımda da haqsızam, axı sosializim dövründə insan arxasında işlədiyi dəzgahdan aşağı sayılırdı, o dəzgaha dəyən ziyana görə insan həbsə atılırdı. Bir də o zaman Allahsız quruluş idi, mənə elə gəlir ki, müalicəmə biganə yanaşan məsul şəxslər də məhz o dövrdə dünyaya gələn, böyüyən və təhsil alanlardır. Buna görə də, bizə münasibətdə ALLAHSIZLIQ edərək dəzgahdan da aşağı münasibət sərgiləyirlər”.(moderator.az)
pia.az