Bakının Nəsimi rayonunda mütəşəkkil quldur dəstəsinin üzvləri həbs edilib
Teleqraf.com xəbər verir ki, bu il iyulun 17-də rayonun Cavadxan küçəsində 3 naməlum şəxs Bakı şəhər sakini Tural Quliyevin qarşısını kəsib.
Onlar Tural Quliyevi döyərək 170 manatını və 2 ədəd mobil telefonunu alıblar. Cinayəti törədənlər hadisə yerini tərk ediblər.
Zərərçəkmiş Tural Quliyev aldığı xəsarətlərdən xəstəxanaya yerləşdirilib. Hadisə ilə bağlı Nəsimi rayon Polis İdarəsinin 19-cu polis bölməsi məlumatlandırılıb.
Polis əməkdaşlarının keçirdikləri əməliyyat-axtarış tədbirləri nəticəsində quldurluğu törətməkdə şübhəli bilinən Ağsu rayon sakini olan bir yeniyetmə tutulub.
Cinayətin daha iki iştirakçısının isə şəxsiyyəti müəyyən edilib və onların kimliyi müəyyən edilərək həbs edilməsi istiqamətində əməliyyat tədbirləri başlanıb.
Bir neçə gün öncə 19-cu polis bölməsi əməkdaşlarının keçirdikləri əməliyyat-axtarış tədbirləri nəticəsində cinayəti törətməkdə şübhəli biliən qrupun digər üzvləri – Sabirabad rayon sakini Röyal Şibliyev, Biləsuvar rayon sakini Elməddin Əhmədov və Salyan rayon sakini Mirheydər Kərimov tutulublar.
Müəyyən edilib ki, Elməddin Əhmədov və Mirheydər Kərimov əvvəllər məhkum olunublar.
pia.az