Kitabda Azərbaycan xalqının milli-mənəvi dəyərləri, məscidlər haqqında ensiklopedik biliklər əks olunub
ANS PRESS-in Dini Qurumlarla İş üzrə Dövlət Komitəsinə istinadla verdiyi məlumata görə, Azərbaycan xalqının milli-mənəvi dəyərləri, ölkə ərazisindəki məscidlər haqqında ensiklopedik bilikləri əhatə edən və bu sahədə ilk əsər sayıla biləcək kitab 300-dən artıq məscid haqqında geniş məlumatları əhatə edir.
İdeyası Azərbaycan prezidenti İlham Əliyevin Şamaxı Cümə məscidinin açılışında qeyd etdiyi “Biz bütün məscidlərimizi bərpa edəcəyik” ifadəsindən qaynaqlanaraq oxucuya təqdim olunan bu əsər Dini Qurumlarla İş üzrə Dövlət Komitəsinin aparıcı mütəxəssiləri ilə yanaşı peşəkar tarixçi, tədqiqatçı, ekspert, fotoqraf və tərcüməçilərdən ibarət geniş bir heyətin gərgin əməyi nəticəsində ərsəyə gəlib.
Kitabın xarici auditoriya üçün tərtibatı, beynəlxalq ictimaiyyətə çatdırılması və nəfis şəkildə nəşri işini Dialoq və Əməkdaşlıq Uğrunda İslam Konfransı Gənclər Forumu həyata keçirib.
Qeyd edək ki, üç dildə (Azərbaycan, ingilis və ərəb) nəşrə olunan kitab həm Azərbaycan, həm də xarici oxuculara Azərbaycan məscid mədəniyyəti haqqında dolğun məlumat verəcək, milli-mənəvi dəyərlərimizin təbliği istiqamətində faydalı olacaq.