Mehriban Vəzir Milli Şura üzvlüyündən çıxarılmasının səbəblərindən danışdı

Yayılan məlumatla bağlı Mehriban Vəzirin fikirlərini aldıq. M. Vəzir  musavat.com-a açıqlamasında qərarın hansı səbəbdən verildiyini aşağıdakı kimi izah etdi:

“Məsələnin  kiçik tarixçəsi ondan ibarətdir ki, aprelin 30-da Mədən Sənayesində Şəffaflığın Artırılması (MSŞA) Koalisiyasının ümumi yığıncağı baş tutdu.  Bu yığıncaqda şuraya və monitorinq qrupuna yeni seçki keçirildi. Namizədlərin sayı 30 nəfərdən çox idi. Eyni zamanda burada iştirakçıların da sayı 140 nəfərdən yuxarı oldu. Yəni çox möhtəşəm tədbir keçirildi. Şuraya seçkinin nəticələri isə əlbəttə, çox təəccüb doğururdu. Çünki sahə üzrə çox məşhur mütəxəssislər bir yana qaldı, onlar 20 səs topladılar. Lakin ilk dəfə bu prosesə qatılan adamlar 100-ə yaxın səs aldılar.  Bu bir qədər təəccüblü idi. Ancaq heç bir pozuntu da yox idi. Seçkilərin  nəticəsi demokratik qaydalara uyğun idi. Buna görə, nəticə bizi düşündürürdü. Buna baxmayaraq, heç  bir etiraz etmədən, nəticələri tanıdıq. Bildiyiniz kimi Milli Şuranın Koordinasiya Mərkəzinin üzvüyəm və bu şəbəkədə də varam.   Səhəri gün isə öz elektron poçtumda bəhs etdiyimiz şəbəkə üzrə Oqtay Gülalıyevin Milli  Şura rəhbərliyinə verdiyi bir raportu oxudum. Raportda deyilirdi ki, hökumətin 400 min vəsait xərclədiyi prosesi darmadağın etdik və onların Milli Şuranı QHT edib nəzarət altına almaqlarına icazə vermədik. Eyni zamanda bildirilirdi ki, artıq şuranın əlli plyus biri (50 +1) bizim adamlardır. Bu qələbəyə, dəstək verənlərə təşəkkür edirəm və sairə.  Yəni bu məktub, Milli Şuranın daxili işlərinə, Oqtay Gülalıyevin şəxsi həyatına   aid deyildi. Bu, yalnız bizə- koalisiyaya aid idi. Eyni zamanda koalisiyanın  üzvləri və namizədləri kimi mənə də aid idi”.

M. Vəzir bildirib ki, bu məktubu götürərək, koalisiya şəbəkəsində çıxış edib:

“Keçmiş koordinator Əliməmməd Nuriyevdən izahat istədim ki, 400 mini hökumət kimə verib? Şuraya  hakim olmuş “50+1” kimlərdir? Bu kimi suallar ünvanladım. 150 nəfərin təmsil olunduğu koalisiya şəbəkəsində poçtuma gəlmiş məktubu yönləndirərək,   açıq şəkildə bu suallarıma cavab istədim. Bizi böhtana salırlar. Eyni zamanda  bir sual da qoydum ki, şura bu şəkildə hansı rolu oynayıb. Bununla da vəziyyət qarışdı. Eyni zamanda yeni seçilən şuranın və Monitorinq qrupunun legitimliyi artıq şübhə altındadır. Nəticə də bəllidir ki,  Milli Şura məni üzvlükdən çıxardı. Ancaq gərək heç olmasa, məndən də izahat istəyərdilər. Çünki əslində Oqtay Gülalıyev bu cür yalan raportla, Milli Şuranın rəhbərliyini aldatmışdı. Burada tam bir böhtan var. Milli Şura çox təəssüf ki,  bu yalanlarla bağlı izahat istəməkdənsə belə bir qərar çıxardı.  Qərarlarını da anlayışla qarşılayıram. 400 min məsələsini koalisiyanın adına yazıblar və mən də Əliməmməd müəllimdən bunun izahatın istəmişəm. İzahat istədiyimə görə də məni üzvlükdən çıxarıblar”.

Şahidi olduğunuz hadisələri çəkib bizə göndərin!