Lavrovun Bakı və Yeravan səfəri: “Tupik”dən çıxış yolu varmı?

Politoloq: “Lavrovun Azərbaycan və Ermənistana səfəri zamanı əsas məqsəd Putinin üçtərəfli görüş üçün təklif irəli sürməyə əsas yaratması idi”

“Əgər Rusiya indi Dağlıq Qarabağ problemini yaxın zamanda həll etməsə, ABŞ-la iş birliyi içinə girə biləcək xəyanətkar ermənilər istənilən təxribatla Rusiyaya arxadani zərbə vura bilərlər”.

Bu sözləri politoloq Mübariz Əhmədoğlu Rusiya xarici işlər naziri Sergey Lavrovun Azərbaycan və Ermənistana səfərini şərh edərkən PİA.AZ-a açıqlamasında qeyd edib.

Xəbər verdiyimiz kimi, Rusiyanın xarici işlər naziri Sergey Lavrov Yeravana səfəri çərçivəsində Ermənistan xarici işlər naziri Edvard Nalbandyanla görüşdən sonra keçirilən mətbuat konfransında bildirib ki, münaqişənin həlli ilə bağlı xüsusi optimizm nümayiş etdirmək istəmir və danışıqlarla bağlı təcrübə göstərir ki, onlar tezliklə başa çatmayacaq. Maraqlıdır ki, müzakirə obyekti kimi Qarabağ münaqişəsinin əsas mövzu olacağı gözlənilsə də, Lavrovun Yeravana səfəri çərçivəsində danışıqlar əsasən NATO və “Şərq Tərəfdaşlığı” ətrafında cərəyan edib.

Rusiyanın xarici işlər naziri Sergey Lavrovun Bakıya və Yeravana səfərinin nəticələri ilə bağlı PİA.AZ-ın əməkdaşı Siyasi İnnovasiya və Texnologiyalar Mərkəzinin direktoru, politoloq Mübariz Əhmədoğlunun fikirlərini öyrənib.

Mübariz Əhmədoğlu: “ABŞ-ın ATƏT-in Minsk qrupunda yeni həmsədri Riçard Şofer də demək olar ki, təşəbbüsü Rusiyanın əlindən alıb”.

Lavrovun Azərbaycan və Ermənistanın səfərinin kökündə yaxın zamanlarda hər üç ölkə prezidentinin üçtərəfli görüşünün təyin edilməsinin durduğunu bildirən politoloq Mübariz Əhmədoğluna görə, Qarabağ münaqişəsində ABŞ-ın təşəbbüsü ələ alma cəhdləri Rusiyanı aktivləşməyə sövq edir:

“Əslində Lavrov regiona sırf Qarabağ məsələsi üçün gəlmişdi. Daha doğrusu, Lavrov özbaşına gəlməmişdi və onu Putin göndərmişdi. Lavrovun Bakıda olduğu kimi, Yerevanda da əsas müzakirə obyekti Qarabağ mövzusu idi. Lavrovun Ermənistanın xarici işlər naziri E. Nalbadyanla görüşdən sonrakı konfransda bəyan etdiyi fikirlər də bunu göstərir. Lavrovun erməni əsilli olması ermənilərə qarşı müəyyən dərəcədə güzəştə getməsinə səbəb oldu. Bu Yeravandakı danışıqlardan sonra keçirilən mətbuat konfransında Lavrovun yanaşmalarında hiss olundu. Hesab edirəm ki, Lavrovun Azərbaycan və Ermənistana səfərində əsas məqsəd Putinin üçtərəfli görüş üçün təklif irəli sürməyə əsas yaratması idi. Düşünürəm ki, bir müddət sonra Putin Azərbaycan və Ermənistan prezidentləri ilə üçtərəfli görüş təklifini irəli sürəcək.

Rusiya üçün Dağlıq Qarabağ probleminin həlli hal-hazırda aktual məsələdir. Çünki Rusiya artıq Yaxın Şərqdəki vəziyyətdə uduzur. Onun əsas kartı kürdlər idi. Kürd kartı da Rusiyanın əlindən çıxıb və kürdlər tam ABŞ-ın nəzarəti altına keçib. Demək olar ki, Suriya problemi öz həllini tapandan və müəyyən zamandan sonra Əsəd hakimiyyəti tərk etdikdən sonra Rusiya Suriyadakı mövqelərini itirəcək. Hal-hazırda Rusiyanın Yaxın Şərq siyasəti pat vəziyyətidir.

Əgər Rusiya indi Dağlıq Qarabağ problemini yaxın zamanda həll etməsə, ABŞ-la iş birliyi içinə girə biləcək xəyanətkar ermənilər istənilən təxribatla Rusiyaya arxadani zərbə vura bilərlər. Rusiya bunu anlayır və başa düşür ki, Qarabağ məsələsini həll etməlidir. Həmçinin ABŞ-ın ATƏT-in Minsk qrupunda yeni həmsədri Riçard Şofer də demək olar ki, təşəbbüsü Rusiyanın əlindən alıb. Bu baxımdan Rusiya aktivləşməyə məcburdur”.

Gülşən ŞƏRİF

pia.az