Ukrayna Pravoslav Vətəndaşları İttifaqının mətbuat katibi Kiril Frolovla “Gecə canavarları” bayker klubunun məşhur lideri “Xirurq” ləqəbli Aleksandr Zaldostanov arasında olan yazışma ortaya çıxıb
Axar.az xəbər verir ki, yazışmanı Ukraynanın “İnformNapalm” təşkilatının rəhbəri Yekatirina Yaresko öz Feysbuk səhifəsində ictimailəşdirib. Yazışmada Frolov Zaldostanova Ukrayna ərazisində həyata keçirilən aksiyalar, təxribatlara xərclənən məbləğlə bağlı məlumat verir.
Maraqlı məqam odur ki, Frolovun təqdim etdiyi xərclər siyahısında silah alışı üçün 200 min dolların ayrılması ilə bağlı məbləğ də yer alıb. İctimailəşdirilən yazışma 27 fevral 2014-cü ilə aid olub.
Qeyd edək ki, Rusiya Krımı 2014-cü ilin martında anneksiya edib. Üstəlik, Moskva həmin ilin ortalarında separatçılara aktiv dəstək verərək, Donbas konfliktini başladıb.
“Xirurq” ləqəbli Zaldostanov Rusiya Prezidenti Vladimir Putinə yaxınlığı ilə seçilir. Bəzi ekspertlər onun Rusiya xüsusi xidmət orqanlarına çalışdığını iddia edirlər. Putinin siyasətini aktiv dəstəkləyən Xirurqa qarşı Qərb ölkələri sanksiyalar tətbiq ediblər.
pia.az