Komissiya üzvündən əfv xəbərlərinə münasibət

Oktyabrın 5-dən qeyd olunacaq Qurban bayramı ərəfəsində əfvin olub-olmayacağı hələ bilinmir

Prezident yanında Əfv Məsələləri Komissiyasının üzvü, deputat Bəxtiyar Əliyev “Media forum” saytına belə deyib.

Deputatın sözlərinə görə, Əfv Komissiyasının iclasları davam edir: “Bəzi nəşrlər Qurban bayramı ərəfəsində əfv sərəncamının imzalanacağını yazırlar. Media bəzi məhbus gənclərin səhvlərini başa düşüb prezidentə müraciət ünvanlamasını əsas götürüb bunu iddia edir. Təbii ki, əfv prezidentin müstəsna səlahiyyətidir, onun konstitusion hüququdur və dövlət başçısı həmişə humanist addımlar atıb. Heç şübhəsiz, prezident də istəməz ki, xüsusilə öz səhvlərini başa düşən gənclər uzun illər həbsdə qalsın. Prezident istəyər ki, hər bir vətəndaş kimi onlar da cəmiyyətdə normal yaşasınlar, inkişaf etsinlər. Bu, ölkənin gənclər siyasətinə tam uyğun bir məsələdir.

Bir məsələni də qeyd edim ki, Azərbaycanda siyasi məhbus yoxdur. Kimsə öz yanından meyarlar düzəldir və buna əsasən hesab edir ki, Azərbaycanda siyasi məhbus var. Bu cür yanaşma beynəlxalq hüquq normaları baxımından doğru deyil.

Əfvə gəlincə, komissiyanın işi əsasnaməyə uyğun aparılır. Vətəndaşlardan, məhkum olunmuş insanların özlərindən ərizələr daxil olur. Müvafiq şöbədə o ərizələrlə bağlı sənədlər hazırlanır. Məhkumların cəza çəkdiyi müəssisələrə, Ədliyyə Nazirliyinə və Ali Məhkəməyə müraciət olunub onlardan rəy alınır. Bu, kəsilməz bir prosesdir. Ərizənin daxil olması o demək deyil ki, dərhal ona baxılır. Müraciət etmiş şəxs haqqında obyektiv məlumatların olması üçün əsasnamədə nəzərdə tutulan sənədlər hazırlanıb komissiya üzvlərinə verilir. Bu məlumatlar vacibdir. Komissiyanın gələcəyi nəticə haqda öncədən məlumat vermək mümkün deyil”