İntihar edən Qarabağ qazisinə dair təfərrüatlar

Cəlilabadda özünü yandıraraq intihar edən Qarabağ qazisi Mirtahir Mürsəlovun barəsində yayılan informasiyalara Daxili İşlər Nazirliyi mətbuat xidmətinin şöbə rəisi Orxan Mansurzadə də münasibət bildirib

Musavat.com-un sorğusuna cavab verən O.Mansurzadə deyib:

"Bir sıra KİV-lərdə Cəlilabad rayonunun Göytəpə şəhər sakini Mirtahir Mürsəlovun döyülməsi və təhqir olunması ilə bağlı etdiyi müraciətlərə baxılmadığına görə özünü yandırması barədə yayılan məlumatlar, əslində, baş vermiş hadisənin mahiyyətinin təhrif olunmuş formada çatdırılmasına xidmət edən, ictimai rəyi məqsədli şəkildə çaşdırmağa yönəlmiş dezinformasiyalardır.

M.Mürsəlovun müraciətlərinə guya etinasız münasibət göstərilməsi barədə yaxınlarının iddialarının əsassız olduğunu göstərmək üçün təkcə bir faktı diqqətə çatdırmaq istərdim. 2014-cü il və cari ilin ötən dövründə Mirtahir Mürsəlov Cəlilabad RPŞ-yə və rayon prokurorluğuna ən müxtəlif məsələlərlə bağlı 4 dəfə müraciət edib, bütün hallarda da həmin müraciətlər əsasında zəruri araşdırmalar aparılıb və qanunvericiliyə uyğun olaraq müvafiq qərarlar qəbul edilib.

İndi yaxınları tərəfindən əsassız olaraq Qarabağ müharibəsinin veteranı və 20 Yanvar hadisələrinin iştirakçısı kimi təqdim olunan Mirtahir Mürsəlov hələ sovet dönəmində ordu sıralarında qulluq edərkən hərbi xidmətdən yararsız kimi tərxis olunub. O, heç bir halda müharibə veteranı və ya 20 Yanvar hadisələrinin iştirakçısı olmayıb.

Cari il mayın 19-da axşam sərxoş halda Göytəpə PB-yə gələn M.Mürsəlov bir neçə şəxs tərəfindən döyüldüyünü iddia edib, əməkdaşlar tərəfindən bu barədə müvafiq ərizə ilə polisə müraciət etmək təklif olunsa da o, bundan imtina edib. M.Mürsəlovun ailə üzvlərinin yerli hüquq-mühafizə orqanları tərəfindən incidilməsi və təqib olunması barədə səslənmiş ittihamlar da əsassızdır.

Araşdırmalar zamanı müəyyən edilib ki, 1987-ci ildən indiyədək soyğunçuluğa, xuliqanlığa və digər cinayətlərə görə 6 dəfə məhkum olunmuş Mirtahir Mürsəlovun Cinayət Məcəlləsinin anoloji maddələrilə təqsirləndirilməsinə dair sonuncu iş üzrə məhkəmənin 04.04.2005-ci il tarixli qərarına əsasən, o, cinayət məsuliyyətindən və cəzadan azad edilməklə, barəsində tibbi xarakterli məcburi müalicə tədbiri tətbiq edilib. Xatırladaq ki, bu şəxs 2001-ci ildən ruhi əsəb xəstəlikləri dispanserində qeydiyyatda olub".

pia.az