Azərbaycan xarici işlər nazirinin müavini, ADA Universitetinin rektoru Hafiz Paşayev Aşqabadda Türkmənistan prezidenti Qurbanqulu Berdımuhammedovla görüşüb
Q.Berdımuhammedov Azərbaycanla çoxəsrlik dostluq və mehriban qonşuluq ənənələrinə uyğun olaraq uzunmüddətli tərəfdaşlıq münasibətlərinin inkişafında maraqlı olduqlarını deyib.
Tərəflər Türkmənistan - Azərbaycan dialoqunun mövcud durumu və inkişaf perspektivləri barədə fikir mübadiləsi aparıblar. Vurğulanıb ki, Xəzər regionu üzrə qonşu olan ölkələr müasir dövrün aktual problemlərinin həll yollarının axtarışında strateji tərəfdaş kimi çıxış edir.
Beynəlxalq Humanitar Elmlər və İnkişaf Universitetinin açılış mərasimində iştirak etmək məqsədi ilə Aşqabad şəhərində səfərdə olan H.Paşayev səfər çərçivəsində həmçinin Türkmənistanın xarici işlər naziri Rəşid Meredov, Xarici İşlər Nazirliyinin nəzdində olan Beynəlxalq Münasibətlər İnstitutunun rektoru B.Zaxırov ilə də görüşüb.
Görüşlərdə Azərbaycanın Türkmənistandakı səfiri Vəhdət Sultanzadə də iştirak edib.