Günəş enerjisini qablaşdırmağın yolu tapılıb

İsveç alimləri bəşəriyyətin ekoloji cəhətdən təmiz enerji əldə etmək uğrunda apardığı çalışmalara yeni ixtira ilə töhfə veriblər

Günəş istisindən bərpa olunan enerji almaqla alimlər bir çox soyuq ərazidə problemlərin həllinə kömək edəcək effektli mexanizm yaratdıqlarını bildiriblər.

Novator.az xəbər verir ki, İsveç alimləri günəş enerjisini yayda toplayıb, qışa saxlamağın yolunu tapıblar. Mütəxəssislər deyirlər ki, bu yolla istilik enerjisini nəinki bir-iki fəsil sonraya, hətta daha uzun müddətə saxlayıb istifadə etmək mümkün olacaq.

Yığılan ehtiyat enerji kütləsinin tərkibinə emal üçün daxil edilən maddə onu bir neçə ay saxlamağa imkan verir. Nəticədə günəşdən alınan enerji itmir və maksimal dərəcədə effektini qoruyur.

Alimlər bildirirlər ki, günəşdən ehtiyat enerji toplamağın vaxtı çoxdan gəlib çatıb. Bu işdə qabağa düşən İsveç alimlərinin tədqiqatına görə, günəşdən alınan enerji ilə su daha yaxşı isinir və yaşayış mənzillərindəki istilik sistemlərini belə enerji ilə qızdırmaq çox effektlidir. Onların fikrincə, yayda günəş batareyalarına yığılan enerjidən qışda istifadə şaxtalı günlər üçün ən yaxşı sığortadır. Ekoloji cəhətdən təmiz olan belə enerji tərkibini dəyişmir, əslində get-gedə duruluq həddinə keçməklə daha da genişlənir.

İsveç alimləri ilk sınağın uğurla başa çatdığını xəbər veriblər. Onların ixtirası mediada şərti olaraq “qablaşdırılmış günəş istisi” adlandırılıb.

pia.az