Avtomobildən tutmuş qida məhsullarınadək İranda istehsal edilən mallar 5 gün ərzində Gəncədə sərgilənəcək
Bu gündən öz işinə başlayan satış-sərgisində İranın 51 şirkəti iştirak edir və Ərdəbil əyalətinin beynəlxalq sərgilər şirkətinin təşəbbüsü ilə Azərbaycanda ilk dəfədir baş tutur.
Kəpəz TV (Region TV) xəbər verir ki, qida, sənaye məhsulları, dərman preparatları, tekstil və geyim, avtomobil, santexnika, kənd təsərrüfatı məhsulları və digər çeşidli mallar Gəncədə İran mallarının ilk sərgisində nümayiş etdirilir.
Mirəyyub Təqəvi, Tələb-Ərdəbil əyalətinin beynəlxalq sərgilər şirkətinin icraçı direktoru: “Hazırda sərgidə 51 şirkət iştirak edir, avtomobil zavodu məhsullarından yeyinti məhsullarına qədər sərgilənir. Biz iş adamlarını dəvət edirik ki, buradakı şirkətlərlə əlaqələr qursunlar və nəticədə hər iki ölkə arasındakı ticarət əlaqələri daha da genişlənsin”.
Hər iki ölkə sahibkarları üçün körpü rolunu oynayan və iqtisadi əlaqələrin genişlənməsinə xidmət edən sərgidə stendlər arasında İranın Ərdəbil əyaləti ilə yanaşı, Qərbi və Şərqi Azərbaycan əyalətləri, Tehran, İsfahan, Əlborz, Məşhəddən şirkətlər də yer alır.
Möhsün Pakayin, İran İslam Respublikasının Azərbaycandakı səfiri: “Hazırda İranla Azərbaycan arasında ticarət mübadiləsi qeyri-neft sektorunda 500 milyon dollardan atrıqdır. Elektrik enerjisi və digər sahələri də əlavə etsək, 1 milyard kimi rəqəm göstərmək olar. Amma potensialın bundan da yüksək olduğuna inanırıq. Ümid edirik ki, 2015-ci ildə bu rəqəmləri iki dəfə artıra bilərik”.
Gəncə Olimpiya İdman Kompleksində keçirilən açılış mərasimində İranla Azərbaycan arasında əlaqələri müsbət inkişafının regional əməkdaşlığa da sirayət etdiyi və bu yaxınlarda Gəncə ilə Təbrizin qardaşlamasının buna misal olduğu bildirilib. Ardından sərgi ilə tanışlıq olub.
Bu gündən başlayan İran məhsulları sərgisi mart ayının 8-nə qədər davam edəcək. Bu kimi sərgilər Gəncədə davamlı olacaq. Bunun üçün "Ekspo məkəz"in tikintisi də nəzərdə tutulub.
pia.az
Digərxəbərlər
Populyar xəbərlər
