Baxış zamanı məhbus qardaşlara məxsus bir ədəd “SHİNO” markalı mobil telefon aparatı aşkar edilərək götürülüb
Penitensiar xidmətin və 12 saylı cəzaçəkmə müəssisəsinin əməliyyat aparatları tərəfindən müəssisədə qadağan edilmiş əşyalar aşkar olunub. ANS PRESS-in Penitensiar xidmətin mətbuat xidmətinə istinadən verdiyi məlumata görə, 17.12.2013-cü il tarixdə həyata keçirilmiş əməliyyat-axtarış tədbirləri nəticəsində 12 saylı cəzaçəkmə müəssisəsində cəza çəkən 1979-cu il təvəllüdlü Elçin Vahid oğlu İsmayılovun və 1974-cü il təvəllüdlü Elsevər Tariyel oğlu İsmayılovun ərzaq saxladıqları dolabçaya baxış keçirilib.
Baxış zamanı onlara məxsus bir ədəd “SHİNO” markalı mobil telefon aparatı aşkar edilərək götürülüb.
Qeyd edək ki, Elçin İsmayılov Azərbaycan Respublikası Cinayət Məcəlləsinin 234.1 maddəsi ilə təqsirli bilinərək 2 il müddətinə azadlıqdan məhrum edilib. Elsevər İsmayılov isə Azərbaycan Respublikası Cinayət Məcəlləsinin 120.2.2; 228.4 və 66.3 maddələri ilə təqsirli bilinərək 14 il müddətinə azadlıqdan məhrum edilib.
Fakt üzrə araşdırma aparılır.