Cümə axşamı, 21 Fevral 2019
USD : 1.7
EUR : 1.996
Hava
+6 ° Baku
-0 ° Quba
-0 ° Qusar
+4 ° Gəncə
+5 ° Lənkəran
+3 ° Naxçıvan
+6 ° Salyan
+3 ° Şəki

Eldar Namazov: “İndi Azərbaycanın ətrafında çox gərgin geosiyasi proseslər gedir”


Beynəlxalq Strateji Araşdırmalar Mərkəzinin rəhbəri: “Azərbaycan Avropa Şurası ilə münasibətlərə yenidən baxıb münasibətləri yaxşılaşdırmaq istiqamətində ciddi addımlar atmalıdır”


“Dağlıq Qarabağda yaranmış durum artıq dözülməzdir və bu işğala son qoymaq üçün Azərbaycan ciddi hərəkətlərlə keçməlidir. Bu mənada bizə hər bir beynəlxalq təşkilatlarla yaxşı münasibətlər qurmaq, Azərbaycanın haqq işində o təşkilatların dəstəyin qazanmaq çox vacibdir”.

Bu sözləri Azərbaycan Naminə İctimai Forumun (ANİF) prezidenti, Beynəlxalq Strateji Araşdırmalar Mərkəzinin rəhbəri, politoloq Eldar Namazov Avropanın siyasi institutları ilə Azərbaycan arasında yaranmış vəziyyəti PİA.AZ-a şərh edərkən qeyd edib.

İyunun 5-dən bəri Avropa Şurası Nazirlər Komitəsində Avropa Məhkəməsinin qərarlarının icra vəziyyəti müzakirə edilir. Avropa Şurası Nazirlər Komitəsinin 2017-ci il üzrə hesabatına görə, Azərbaycan hökuməti Avropa Məhkəməsinin ümumilikdə 115 qərarı ilə bağlı təzminatları ödəmir. Həmçinin bildirilir ki, Azərbaycan Avropa Məhkəməsinin qərarlarını icra etməməsinə görə 3-cü yerdədir. Ümumilikdə 2017-ci ildə çıxarılan qərarlar üzrə Azərbaycan hökuməti 817 min avro cərimələnib.

Azərbaycanın Avropa Məhkəməsindəki nümayəndəsi Çingiz Əsgərov isə deyir ki, Bakı bu məhkəmənin bütün qərarlarıyla bağlı lazımi addımlar atır: “İlqar Məmmədovla bağlı qərarı göndərmişik məhkəməyə. Ali Məhkəmə bu qərarın plenumuna çıxarılıb, çıxarılmaması və ya necə icra edilməsi ilə bağlı qərar qəbul etməlidir. O ki qaldı başqa məsələlər, yəni fərdi işlərlə bağlı tədbirlər, vaxtında görüləcək”. Çingiz Əsgərov təzminatların ödənməməsi ilə bağlı sualı isə qısa cavablayıb. Bildirib ki, bütün tələblər icra edilir.

Qeyd edək ki, bu gün Avropa Şurası Nazirlər Komitəsində REAL partiyasının sədri, həbsdə olan İlqar Məmmədov və daha bir neçə nəfərin işi ilə bağlı Avropa Məhkəməsinin qərarının icra edilməməsinə dair qərar verəcək.

Ötən ay AŞ PA-da Azərbaycana qarşı tətbiq edilən sanksiyadan sora və hazırda siyasi məhbus məsələsi ilə bağlı Avropanın siyasi institutları ilə Azərbaycan arasında yaranmış vəziyyəti necə dəyərləndirmək olar və yaxın gələcəkdə Azərbaycanla Avropa Birliyi arasında münasibətlər gərginləşə bilərmi?  

Mövzu ilə bağlı PİA.AZ-ın əməkdaşı Beynəlxalq Strateji Araşdırmalar Mərkəzinin rəhbəri politoloq Eldar Namazova müraciət edib.

Eldar Namazov: “Azərbaycanla Avropa Şurası arasında yaranmış xoşagəlməz durum heç bir tərəfin xeyrinə deyil”.


Azərbaycanın haqq işində beynəlxalq təşkilatların dəstəyini qazanmağın çox vacib olduğunu vurğulayan Eldar Namazov PİA.AZ-a açıqlamasında bildirib ki, Azərbaycan Avropa Şurası ilə münasibətlərinə  yenidən baxıb ikitərəfli münasibətlərə mane olan bütün problemləri aradan qaldırmalıdır:

“Bu vəziyyət kifayət qədər mürəkkəbdir. Hesab edirəm ki, Azərbaycanla Avropa Şurası arasında yaranmış xoşagəlməz durum heç bir tərəfin xeyrinə deyil. Azərbaycan Avropa Şurası ilə münasibətlərə yenidən baxıb münasibətləri yaxşılaşdırmaq istiqamətində ciddi addımlar atmalıdır. Siz sadaladığınız faktlardan başqa Avropa Şurasının Parlament Assambleyasının yay sessiyasında Azərbaycanda siyasi məhbuslar üzrə yenidən məruzəçi təyin olunması gözlənilir. 

Artıq bu günlərdə Avropa Şurasının Bürosu bu qərarı verib. Bu ayın sonlarında Avropa Şurasının yay sessiyasında Azərbaycanda siyasi məhbuslar üzrə yenidən məruzəçi təyin olunması qərarı rəsmi təsdiq olunmalıdır. Bütun bunlara görə də Azərbaycan hansısa, addım atmalıdır. Azərbaycan Avropa Şurası ilə münasibətlərinə  yenidən baxıb ikitərəfli münasibətlərə mane olan bütün problemləri aradan qaldırmalıdır. 

Eldar Namazov: “Avropa Şurası ilə Azərbaycan arasında olan münasibətlərin yaxşılaşdırılmasına çox böyük ehtiyac var”.


Bildiyimiz kimi indi Azərbaycanın ətrafında çox gərgin geosiyasi proseslər gedir. Dağlıq Qarabağda yaranmış durum artıq dözülməzdir və bu işğala son qoymaq üçün Azərbaycan ciddi hərəkətlərlə keçməlidir. Bu mənada bizə hər bir beynəlxalq təşkilatlarla yaxşı münasibətlər qurmaq, Azərbaycanın haqq işində o təşkilatların dəstəyin qazanmaq çox vacibdir. Bir sıra vacib beynəlxalq təşkilatları sırasında Avropa Şurası da aiddir. Azərbaycanın ümummilli probleminin həllinə mane olan bütün problemləri addım-addım aradan qaldırmaq lazımdır. O cümlədən Avropa Şurası ilə Azərbaycan arasında olan münasibətlərin yaxşılaşdırılmasına çox böyük ehtiyac var.”

Xatırladaq ki, bu gün AŞPA Azərbaycanda siyasi məhbus məsələsi üzrə məruzəçi təyin edəcək. “Turan”ın məlumatına görə, bu barədə qərar AŞPA-nın Büro iclasında qəbul edilib. AŞPA-nın mətbuat xidmətinin yaydığı məlumata görə, məruzəçi iyunun 25-dən 29-dək Fransanın Strasburq şəhərində keçiriləcək sessiyada təyin ediləcək. Qeyd edək ki, Azərbaycanda siyasi məhbuslar üzrə hesabatın hazırlanması və yeni məruzəçinin təyin edilməsi təklifini 2 ay əvvəl deputat Pieter Omtzigt başda olmaqla AŞPA-nın 24 deputatı irəli sürmüşdü. 

Bu, AŞPA deputatlarının analoji təkliflə çıxış etdikləri ilk hal deyil. Belə ki, hələ 2013-cü ildə AŞPA-nın almaniyalı deputatı Kristofer Ştrasser Azərbaycanda siyasi məhbuslarla bağlı hesabat hazırlamışdı. Amma o vaxt hesabat rədd edildi.

Xatırladaq ki, Azərbaycan rəsmiləri ölkədə siyasi məhbus olması ilə bağlı fikirləri qəbul etmirlər. Onlar deyirlər ki, siyasi məhbus olduğu iddia edilən şəxslər törətdikləri konkret əməllərə görə məsuliyyətə cəlb olunublar.

Maraqlıdır ki, son vaxtlar AŞPA-da güclü anti-Azərbaycan əhval-ruhiyyəsi müşahidə olunur. Təkcə onu xatırlatmaq kifayətdir ki, təxminən bir ay əvvəl Azərbaycanın AŞPA-dakı  nümayəndə heyətinin başçısı Səməd Seyidov barəsində korrupsiya ittihamları ilə sanksiyalar qəbul edilmişdi...

Nərminə UMUDLU
pia.az
Etiket:
loading...