Tanınmış idmançı, dəfələrlə çempion olmuş Reyhan Məmmədovanın ölümü ilə nəticələn ağır yol nəqliyyat hadisəsini törədən Əlifağa Məmmədovun cinayət işi üzrə məhkəmə prosesi başa çatıb
Lent.az-ın məlumatına görə, Bakı Ağır Cinayətlər Məhkəməsində hakim İradə Həsənzadənin sədrliyi ilə keçirilən prosesdə təqsirləndirilən şəxs son sözlə çıxış edərək peşman olduğunu deyib:
"Valideynlərindən çox üzr istəyirəm, başsağlığı diləyirəm. Mən də valideynəm. Sizin düşüncələrinizi başa düşürəm. O, uşaq həm də vətənə xeyirli olub. Hər zaman bayrağımızı qaldırıb. Üzr istəyirəm. Bağışlayın. Belə bir hadisənin baş verməsini istəməzdim".
Prosesdə hökm oxunub. Hakimlər kollegiyasının hökmünə əsasən, Əlifağa Məmmədov 7 il 6 ay müddətinə azadlıqdan məhrum edilib.
Qeyd edək ki, hadisə bu il iyun ayında Xətai rayonu Zığ şosesindəki SOCAR yanacaqdoldurma məntəqəsinin qarşısında baş verib. "BMW" markalı, 90 XU 928 dövlət nömrə nişanlı maşınla vurulan 22 yaşlı Reyhan Məmmədova hadisə yerində ölüb. Hadisəni törətməkdə təqsirli bilinən Əlifağa Məmmədov saxlanılıb. Onu da qeyd edək ki, Reyhanə Məmmədova dağadırmanma, qayayadırmanma, buzadırmanma üzrə çempion olub.
pia.az