Şənbə, 23 Fevral 2019
USD : 1.7
EUR : 1.996
Hava
+6 ° Baku
-0 ° Quba
-0 ° Qusar
+4 ° Gəncə
+5 ° Lənkəran
+3 ° Naxçıvan
+6 ° Salyan
+3 ° Şəki

Boykot yolu seçkilərdən qaçmaq üçün bahanədir, yoxsa imkansızlıq...


Yadigar Sadıqov: “Azərbaycanda müxalifətçi olmaq cəzalıdır. Müxalifətçilər həbs olunur, işsiz qalırlar və mühacir olmağa məcbur olurlar”


Məhəmməd Əsədullazadə: “Hesab edirəm ki, növbəti 7 il ərzində seçkiyə qatılmayan bəzi siyasi partiyaların fəaliyyətində ciddi hər hansı irəliləyiş olmayacaq və öz elektoratını itirəcək”.

Məlumdur ki, aprelin 11-də Azərbaycanda  növbədənkənar prezident seçkiləri keçiriləcək. Radikal müxalifətiin bəzi siyasi qüvvələrini özündə birləşdirən Milli Şura isə nöbvədənkənar seçkini boykot etmək qərarını səsləndirib. Həmçinin Müsavat Partiyası da prezident seçkilərində iştirak etməyəcək. Bu barədə Müsavat Partiyasının növbədənkənar məclisində qərar verilib.

Bəzi ekspertlərin iddialarına görə, seçkinin önə çəkilməsi məhz müxalifətə seçkini boykot etmələri üçün verilmiş bir bəhanə olub. Müxalifətin boykotunu tənqid edənlər öz növbəsində bildirirlər ki, siyasi partiyaların əsas işi seçkilər arası dönəmdə seçkilərə hazırlaşmaq və seçkilərdə iştirak etməkdən ibarətdir. 

Məsələyə sırf siyasi texnologiya baxımından yanaşsaq, növbədənkənar seçkilərdə müxalifətin iştirak etməkdən imtinasını necə dəyərləndirmək olar? Boykotdan sonra müxalifətin bu və ya digər şəkildə siyasi proseslərdə iştirak etmək və proseslərə nüfuz etmək imkanları qalırmı? Ümumiyyətlə, Azərbaycanda keçiriləcək növbədənkənar prezident seçkilərinin beynəlxalq təşkilatlar tərəfindən dəyərləndirməsinə müxalifətin seçkilərdə iştirak etməməsi təsir edəcəkmi ? Və aprel seçkilərindən sonra Azərbaycanın xarici aləmdəki nüfuzunun müsbət, ya da mənfi istiqamətdə dəyişəcəyi gözlənilirmi yoxsa Azərbaycanın beynəlxalq nüfuzunda heç bir şey dəyişməyəcək?

Mövzu ilə bağlı PİA.AZ-ın əməkdaşı Müsavat başqanının müavini Yadigar Sadıqov və AXCP, (Razi Nurullayevin rəhbərlik etdiyi qrup. Red!), sədrinin müavini, Cənubi Qafqaz Təhlükəsizlik və Sülh İnstitutunun sədri Məhəmməd Əsədullazadənin fikirlərini öyrənib.

Картинки по запросу yadigar sadıqov

Yadigar Sadıqov: “Bu repressiv siyasətə qalib gəlməyənə qədər müxalifətin vəziyyəti heç də ürəkaçan olmayacaq”.


Aprel seçkilərinin Azərbaycanın beynəlxalq nüfuzunda hansısa ciddi təsirə malik olmayacağını bildirən Müsavat başqanının müavini Yadigar Sadıqova görə, ölkədə müxalifətin siyasi fəaliyyətinə şərait yaradılmaması hakimiyyətin nüfuzuna da mənfi təsir edir: 

“Müxalifətin  növbədənkənar prezident seçkilərində iştirak etməkdən imtina etməsinin səbəbi ondan ibarətdir ki, Azərbaycanda seçki mühiti yoxdur. İnsanlar sərbəst şəkildə seçmirlər. Bütün seçki orqanlarında hər şey saxtakarlıqla həyata keçirilir. Xalqın verdiyi səs heç bir rol oynamır. Onlar özləri istədikləri insanı seçirlər. Bununla yanaşı, mən və digərləri tərəfindən  seçkilərdə iştirak edib seçki kampaniyasının verdiyi minimum imkanlardan yararlanmaq təklif edilmişdi. Lakin növbədənkənar prezident seçkilərinin təyin olunması ilə bağlı məhz Müsavat Partiyasında iştirak etməmək təklifi daha çox səs topladı.
 
Ölkəmizdə müxalifətin əsas problemi seçkini boykot edib-etməməsi deyil. Əsas problem odur ki, müxalifətin  siyasi fəaliyyət  imkanları getdikcə daralır. Azərbaycanda müxalifətçi olmaq cəzalıdır. Müxalifətçilər həbs olunur, işsiz qalırlar və mühacir olmağa məcbur olurlar. Bu repressiv siyasətə qalib gəlməyənə qədər müxalifətin vəziyyəti heç də ürəkaçan olmayacaq. 

Təəssüf ki, hakimiyyət Azərbaycanın nüfuzunun beynəlxalq aləmdə artması istiqamətində heç bir ciddi addım atmayıb. Azərbaycanın beynəlxalq aləmdə nüfuzunun artması üçün aprel seçkilərinə ehtiyac yoxdur. Nüfuzun artması üçün normal seçkilərin keçirilməsi, siyasi məhbusların azad olunması, siyasi fəaliyyət üçün cəzasız mühitin yaradılmasına, siyasi müstəvinin yaradılmasına ehtiyac var. Eyni zamanda korrupsiyanın yığışdırılması, iqtisadi azadlıqların genişləndirilməsi də bu amillər sırasında olmalıdır”. 

Картинки по запросу məhəmməd əsədullazadə

Məhəmməd Əsədullazadə: “Seçkidən sonra hakimiyyətin kardinal islahatlara gedəcəyinə inanmıram”.


Bəzi müxalifət  partiyalarının seçkilərdən imtina etməsinin onların yeniliyə hazır olmadıqlarından irəli gəldiyini ehtimal edən   AXCP sədrinin müavini  Məhəmməd Əsədullazadənin fikrincə,  müxalifətin boykotu seçkinin legitimliyinə kölgə salmayacaq:

“Aprelin 11-də təyin olunan növbədənkənar prezident seçkiləri siyasi müxalifəti hazırlıqsız yaxaladı. Müxalifət oktyabr ayına hazırlıq görürdü və bu istiqamətdə işlərini davam etdirirdi. Amma seçki məcəlləsində dəyişikliklərdən sonra növbədənkənar seçkilərin keçirilməsi ehtimalını artırmışdı. Yenə də verilən rəsmi açıqlamalardan aydın olurdu ki, seçkilər oktyabr ayındadır. Hər bir seçki mahiyyətindən asılı olmayaraq, xalqla siyasi təması və xalqın siyasi proseslərdə aktivliyinin artmasına gətirir. Bundan mütləq müxalifət maksimum istifadə etməli və seçkiyə qatılmalıdır. 

Bəzi müxalifət  partiyalar seçkiyə qatılmasa da,  bu seçkinin legitimliyinə kölgə salmayacaq və seçkilər baş tutacaq. Onsuz da siyasi müxalifətin aktiv olduğu illərdə 1998 və  2008-ci il seçkilərində baykot  heçnəyi dəyişmədi və hazırkı hakimiyyət öz mövqeyini qoruyub saxladı. Seçkiyə getmək lazım idi və xalqı siyasi proseslərə çəkmək mütləqdir. Artıq dünyada yeni nizam formalaşır, 2018-ci il 1998-ci il deyil. Yeni nəsil yetişib və bu nəsilə aydın mesajlar vermək mütləqdir. 

Görünür, seçkiyə qatılmayanlar yeniliyə hazır deyil, 1988-ci ildə qalıblar. Hesab edirəm ki, növbəti 7 il ərzində seçkiyə qatılmayan bəzi siyasi partiyaların fəaliyyətində ciddi hər hansı irəliləyiş olmayacaq və öz elektoratını itirəcək. Halbuki bu seçkidə cəmiyyətə və yeni nəsilə aydın mesajlar verib, siyasi proseslərdə dinamika etmək olar. Bununla da hakimiyyəti fakt qarşısında qoymaq olardı. Görünür, bu imkanları bəzi siyasi müxalifət partiyaları görmür və ya görmək istəmir. 

Məhəmməd Əsədullazadə: “Seçkiyə qatılmayanlar yeniliyə hazır deyil, 1988-ci ildə qalıblar”.


Sistem kifayət qədər sərt idarəetmə formalaşdırıb. Xalqı siyasi-iqtisadi proseslər barədə məlumatlandırmaq lazımdır. Qeyd edim ki, xalqımız daima seçkilərdə həssas olub və siyasətə yaxın gəlib. Bunu canlandırmaq və yeni siyasi proseslərə başlamaq lazımdır. Qeyd edim ki, müxalifətin güclü olan dönəmlərində boykot qərarlarına baxmayaraq, beynəlxalq təşkilatlar seçkinin legitimliyini tanıyıb və bu seçkidə də tanıyacaq. Hakimiyyət anti-demokratik siyasət aparsa, ölkədə siyasi azadlıqların qarşısını alsa da göründüyü kimi,  proseslər iqtidarın lehinə uyğun davam edir. Seçkidən sonra hakimiyyətin kardinal islahatlara gedəcəyinə inanmıram. Struktur islahatlara başlanılsa da,  sistemin davam etməsi və hüquqi və siyasi islahatlar gözləmirəm. 

Ümumiyyətlə, demokratik islahatlar hakimiyyətin mahiyyətinə ziddir. Sadəcə imitasiya xarakterli islahatlar olacaq. Ölkədə total idarə sistemi güclənəcək və  demokratik təsisatların inkişafına icazə verilməyəcək. Ölkənin  beynəlxaq nüfuzunu gücləndirmək üçün Avropa İttifaqı ilə çərçivə sazişi bağlanmalı və islahatlara gedilməlidir. Bu baş verməsə, ölkəmiz beynəlxaq miqyas və   təşkilatlarda mənfi reytinq cədvəllərində olduğu kimi davam edəcək.

Onu da qeyd edim ki, AXCP Təşəbbüs qrupu olaraq Razi Nurullayevin namizədliyini irəli sürmüşük. Bu seçkilərdə iştirak edərək, yeni gənc nəsli ətrafımızda birləşdirəcəyik və yeni dəyişikliklər üçün siyasi sferada güclənəcəyik”.

Gülşən ŞƏRİF
pia.az
Etiket:
loading...