Səhiyyə Nazirliyinin Respublika Neyrocərrahiyyə Xəstəxanasına il ərzində 10 mindən çox xəstə müraciət edir
Ötən il 2111 xəstə cərrahi əməliyyat edilib. Bu ilin birinci yarısında isə 1100 xəstə əməliyyat olunub.
Virtualaz.org saytı xəbər verir ki, bunu xəstəxananın baş həkimi Kabus Dadaşov bu gün keçirilən mətbuat konfransında bildirib.
K.Dadaşovun sözlərinə görə, müraciətlər əsasən baş beyin və onurğa beyin törəmələri, kəllə-beyin travmaları, baş beyinin damar mənşəli patologiyaları, onurğa beyin travmaları xəstəlikləri ilə bağlı olur. “Xəstəxanamızda uşaq neyrocərrahiyyə şöbəsi yaradılıb. Bu şöbədə travmalar, törəmələr, anadangəlmə inkişaf qüsurlu xəstələr və digər problemi olan uşaqlar müalicə olunurlar. Anadangəlmə onurğa beyin yırtığı olan uşaqların sayında artım qeydə alınır, bu isə aşkarlama faktoru ilə əlaqəlidir. Yəni 10-15 il əvvələdək müasir avadanlıqların sayı az olub. İndi respublikanın istənilən bölgəsində MRT (maqnit-rezonans tomoqrafiyası) aparatı var”, - baş həkim deyib.
K.Dadaşov bütün dünyada neyrocərrahiyyə əməliyyatlarında ölüm faizinin yüksək olduğunu deyib: “Son vaxtlar qeydə alınan yol nəqliyyat hadisələrində ciddi baş-beyin travmaları alanlar çoxdur. Bu xəstəxanaya ən ağır xəstələr gətirilir. Amma ölüm faizi qəbul olunmuş normaya uyğundur”.
Baş həkim onu da əlavə edib ki, hazırda xəstəxanada ən mürəkkəb cərrahi əməliyyatlar həyata keçirilir. Neyrocərrahi əməliyyatlara ehtiyacı olanlar daha xaricdə üz tutmurlar, onlar yerli mütəxəssislərə etibar edirlər.
pia.az