Paytaxtda tikinti-söküntü qalmaqallarının ardı-arası kəsilmək bilmir. Bu dəfə Yasamal rayonu, Zahid Xəlilov küçəsi, 30A ünvanındakı 4 bloklu beşmərtəbəli binanın söküntüsü zamanı ərazinin çirkləndirilməsi, tullantıların küçəboyu səpilməsi sakinlərin narazılığına səbəb olub
Virtualaz.org-un redaksiyasına müraciət edən Zahid Xəlilov küçəsinin sakinləri deyirlər ki, söküntü zamanı binadan çıxan tullantılar digər binaların həyətinə yığılır, toz-torpaqdan nəfəs almaq mümkün deyil. Üstəlik, təhlükəsizlik qaydalarına da riayət edilmir. “Bina sökülmədən əvvəl ağacların fotolarını çəkmişik. Yaşıllıqların məhv edilməməsi üçün gecə-gündüz növbə çəkirik”, - sakinlərdən biri deyib.
Bina Nazirlər Kabinetinin qərarı ilə pilot layihəyə düşüb, 56 sakin müvəqqəti kirayəyə köçürülüb. Binanın yerində çoxmərtəbəli yaşayış binası tikiləcək. Sakinlər deyirlər ki, söküntü gecə də davam edir, səs-küydən istirahət edə bilmirlər. Sakinlərdən Yaşar Mahmudov söyləyib ki, dəfələrlə orada işləyən fəhlələrlə mübahisə yaranıb, inşaatçılar onlara 3 növbədə işləməyin tapşırıldığını deyirlər: “Bizim əsas məqsədimiz yaşıllığın qorunmasıdır. Onsuz da hər gün bir göydələn tikilir, sıxlıqdan nə rahat hərəkət edə bilmirik, nə də nəfəs almaq mümkündür. Heç olmasa, ağacları qoruya bilək”.
Yasamal Rayon İcra Hakimiyyətinin özünü təqdim etmək istəməyən əməkdaşı isə deyib ki, binanın söküntüsü tamamlanmaq üzrədir, bir mərtəbə qalıb. Müvəqqəti narahatlıqdır, tikintidən sonra ərazi abadlaşdırılacaq, yaşıllıq salınacaq.
Ekologiya və Təbii Sərvətlər Nazirliyindən isə deyiblər ki, sakinlərin şikayəti araşdırılıb. Tozun ətrafa yayılmasına görə vəzifəli şəxs qismində Rafail Mirzəyev İnzibati Xətalar Məcəlləsinin 233.1-ci maddəsi ilə 2500 manat cərimələnib. “Ərazidə olan ağaclar sayılıb və sahibkar da məlumatlandırılıb. Ərazi nəzarətdədir”, - nazirlikdən əlavə ediblər.
Etiraf edək ki, cərimənin məbləği burada tikilən binada uzağı 2-3 kvadrat metrin qiymətinə bərabərdir və bu cür tədbirlərlə tikinti şirkətlərini qaydalara riayət etməyə məcbur etmək qeyri-mümkündür.
pia.az
Digərxəbərlər
Populyar xəbərlər
