Ötən aylar ərzində Avropada baş verən teraktlara nəzər saldıqda bu faktı açıq şəkildə görmüş olarıq.  Nəticə olaraq artıq Avropanın illər uzunu sakit, iğtişaşlardan uzaq olan şəhərlərində belə, terror hadisələri törədilir. Hətta xüsusi xidmət orqanlarının səriştəsi dünyaca məşhur olan ölkələr belə bunun qarşısını ala bilmirlər. 

Nəzərə alaq ki, dünyada əhalinin sürətlə çoxalması, insanların tələbatının artması ilə əlaqədar sənaye istehsalının miqyası sürətlə genişlənir. Buna görə də istehsal proseslərinə cəlb edilən xammalın, təbii sərvətlərin və energetik resursların həcmi və miqdarı da getdikcə artır. Bu hal isə dünyada təbii sərvətlərin tükənməsinə və alternativ enerji mənbələrinə tələbatı artırır. Alternativ enerji mənbələri sırasında isə  atom-elektrik stansiyaları (AES) xüsusi yer tutur. Hansı ki, Avropa ölkələrinin bir çoxunda enerjini  elə daha çox AES-lər vasitəsilə alırlar.

Bəs terrorçular bu AES-ləri hədəfə ala bilərlərmi? Qeyd edək ki, son zamanlar teraktların baş verdiyi Belçikada, Almaniyada, Fransada xeyli sayda AES var. 

Ekspert Arzu Nağıyevə görə, terrordan heç bir təşkilat və qurum sığortalanmayıb: “Baş verən hadisələr bir daha göstərdi ki, Avropada xüsusi xidmət orqanlarının işi bir o qədər də yüksək səviyyədə deyil. Bunu biz həm Almaniyada, həm Fransada, həm də digər hadisələr zamanı da müşahidə etdik. Ancaq AES-lərin və digər bu kimi qurumların hərbiləşmiş qorunması həm Avropada, həm də bütün Qərb dövlətlərində təşkil olunub. Düşünürəm ki, AES-lər qorunan obyektlərin siyahısına daxil olduğu üçün onların mühafizəsi hərtərəfli formada və bir neçə mərhələli şəkildə həyata keçirilir.  Eyni zamanda həm onların işçilərinin tərkibində, həm də yaxınlıqda yaşayan müxtəlif vətəndaşların obyektlərin qorunmasında müstəsna rolu var və xüsusi xidmət orqanları ilə əlaqəli olurlar. Təbii ki, bu kimi obyektlər hədəf kimi götürülə bilsə də, onların qorunması yüksək səviyyədə təşkil olunduğundan orada hər an terror aktı törətmək mümkün deyil. Bundan əlavə, hər bir AES və digər qurğuların terrora və ya hansısa təbii fəlakətə qarşı avtomatik olaraq antireaksiya sistemi var”.

Ekspert bildirib ki, İŞİD və digər terror təşkilatlarının AES-lərdə terror törətməsini düşünmür: “Çünki onların idarə edildiyi mərkəzlərin qarşısında adətən bu cür məsələlər qoyulmur. Bunların əsas məqsədi hansısa hakimiyyəti devirmək, insanların arasında narazılıq salmaq, qorxu yaratmaq və KİV vasitəsilə öz varlıqlarını sübuta yetirməkdir. Eyni zamanda Avropada hər hansı bir AES-ə qarşı törədiləcək terror aktı təkcə həmin dövlətə deyil, ətraf dövlətlərə qarşı yönəldiyindən, bunlar artıq böyük terrordan yayına bilməzlər. Bu baxımdan, düşünmürəm ki, terror təşkilatları AES-ləri hədəfə alsınlar”.

Yazıçı-konspiroloq Həmid Herisçi isə mövzu ilə bağlı maraqlı məqamlar söyləyib: “Dünya konspiroloqları belə bir fikir səsləndirirlər ki, 2011-ci ildə Saxalin və  Kuril adalarında vəziyyət kəskinləşir. Belə ki, yaponlar dəfələrlə ruslardan xahiş edirdilər ki, həmin əraziləri qaytarsınlar. Belə vəziyyətdə Rusiya çətin durumda idi. Nəticədə Rusiya çox gizli tektonik silahdan istifadə edərək, Sakit okeanda sunami yaradır. Həmin dalğalar isə birbaşa AES-lərin üzərinə gəlir. Yəni bu, öncədən hesablanmışdı. Bu texnologiyalar İkram Kərimov texnologiyaları sayılır. İkram Kərimov ilk tektonik silahın yaradıcısı, zəlzələşünas alimdir. O, çox qapalı adamdır və heç kimlə görüşmür. Bu faktın özü belə onun barəsində çox şey deyir. Mövzuya qayıdaraq bildirim ki, məndə olan məlumata görə, həmin hadisədən iki həftə əvvəl Yaponiyanın qırıcı təyyarələri əraziyə yaxın yerə gətirilib. Onlar Rusiyaya qarşı hansısa əməliyyat hazırlayırmışlar. Lakin əmrə bir neçə dəqiqə qalmış sunami yaşanıb. Onu da qeyd edim ki, ilk dəfə AES-ə hücum Çernoblda təşkil olunub və bunun qəza deyil, məhz hücum olması indilərdə sübut olunur. SSRİ nüvə ölkəsidir və onunla açıq mübarizəyə girmək mümkün deyildi. Yəni ilk qurban Yaponiya deyil, SSRİ olub. Yaponiyada baş verən hadisə isə buna gecikmiş cavabdır”.