Avropa Birliyi Suriya qaçqınlarının Ermənistana inteqrasiyasına kömək üçün Yerevana 3 milyon avro yardım ayırıb
Virtualaz.org yerli KİV-ə istinadən bildirir ki, bu barədə Ermənistan Xarici İşlər Nazirliyi məlumat yayıb.
Qeyd edək ki, Suriyada vətəndaş müharibəsi başlayana qədər bu ölkədə 110 min erməni yaşayıb. Müharibənin başlanmasından sonra ölkəni 90 min erməni tərk edib. Onların böyük qismi Livan, İordaniya, Türkiyə və Ermənistanda yerləşib. Rəsmi Yerevanın açıqlamasına əsasən, Ermənistanda məskunlaşan ermənilərin sayı 22 min nəfər təşkil edib.
Yerevan dəfələrlə ölkəyə əlavə valyuta ehtiyatlarının cəlbi üçün Suriya erməniləri adından istifadə edib. Ermənistan hökuməti bu erməniləri Azərbaycanın işğal edilmiş Qarabağ ərazilərində yerləşdirməyə çalışıb. Hətta Yerevan erməni diasporunun maliyyə imkanlarından yararlanaraq, Zəngilan və Qubadlı rayonlarının ərazilərində Suriya erməniləri üçün şəhərciklər salmağa cəhd də göstərib.
Amma Suriya ermənilərinin heç də hamısı Ermənistanda yaşamaq istəmir. Belə ki, Ermənistana gələn bu ermənilər ölkədəki işsizlik və ağır iqtisadi vəziyyət ucbatından daha yüksək rifah şəraitinin olduğu Avropaya müxtəlif vasitələrlə çıxış yolu əldə etməyə çalışırlar.
pia.az