Ağcabədidə toy zamanı baş verən dava qətllə nəticələnib
Hadisə rayonun Hacıbədəlli kəndində olub. Toyda baş verən mübahisə davaya çevrildikdən sonra tərəflər bıçağa əl atıb. Nəticədə 6 nəfər xəsarət alıb. Yaralılar Ağcabədi MRX-na çatdırlısa da, xəsarət alan bəyin xalası oğlu 21 yaşlı Elnur Məmmədovun həyatını xilas etmək mümkün olmayıb. Oğlunun dünyasını dəyişməsindən xəbəri olmayan Nəzakət Abbasova isə hadisə barədə bunları dedi:
“Dava düşdü, sonra da sakitçilik oldu, evin adamları məndən xahiş etdi ki, şikayət etməyim. İş bağlanacaqdı”.
Xəstəxanadan aldığımız məlumata görə, bıçaq Elnur Məmmədovun ürək nahiyəsinə yaxın hissəyə dəyib. Ağcabədi MRX-nın cərrahiyə şöbəsindən onu da bildirdilər ki, xəsarət alanlardan biri də bəy anası Akifə Orucova olub. Vəziyyəti normal olduğundan artıq evə buraxılıb.
Digər yaralıların müalicələri davam etdirilir. Hadisə baş verən ünvanda olsaq da ailə üzvləri açıqlama verməkdən imtina etdi.
Ağcabədi Rayon Prokurorluğundan verilən məlumata görə, hazırda araşdırmalar gedir və faktla bağlı hələlik saxlanılan yoxdur. Hadisənin hansı səbəbdən, kim və ya kimlər tərəfindən törədilməsi isə rayon prokurorluğunun araşdırmasından sonra məlum olacaq.