Şimali Koreya isə daha bir təhlükəli silahı sınaqdan keçirməyə hazırlaşır
ABŞ silahlı qüvvələri yaxın günlərdə Cənubi Koreya ilə müştərək olaraq yeni hərbi təlimlərə başlayacaq.
Lakin əvvəlki təlimlərdən fərqli olaraq bu dəfə müharibə riski daha yüksəkdir.
“Ilçi- Azadlıq gözətçisi” (Ulchi - Freedom Guardian) adı verilən təlimlər avqustun 21-də başlayıb 10 gün sürəcək”,- The Washington Post qəzetində Den Lamotun məqaləsində bildirilir.
Məqalədə təlim zamanı 25 min ABŞ və on minlərlə Cənubi Koreya əsgərinin iştirak edəcəyi yazılıb.
Təlimlərin əsas hədəfi Cənubi Koreyanın şimaldan gələn təhlükələr qarşısında müdafiə qabiliyyətinin yoxlanılmasından ibarətdir.
ABŞ ordusunun Cənubi Koreyadakı nümayəndəsi, polkovnik Çed.Q.Kerrol hərbi qərargahın hələ ki təlimlərin miqyas, format və şüarlarını dəyişdirmək niyyətində olmadığını söyləyib.
Bu həftənin 1-ci günü isə Şimali Koreya keçiriləcək manevrlərin gedişində təsadüfi insidentin belə nüvə münaqişəsini alovlandıra biləcəyi barədə xəbərdarlıq edib.
“Hərbi potensial məhz bu günlər üçündür. Bu bizim diplomatik addımlarımızın fundamentini təşkil edir. Biz istənilən təhdidə hazır olmalıyıq”,- ABŞ Silahlı qüvvələrinin baş qərargah rəisi Cozef Danford bildirib. (ABŞ ordusunda bu vəzifə “Qərargah rəislərinin birləşmiş komitəsinin sədri” adlanır-red).
Məqalə müəllifi Şimali Koreyanın son günlərdə mövqeyini bir qədər yumşaltdığını da qeyd edib. Bu ABŞ müdafiə naziri Ceyms Mettisin Şimali Koreyanın Quam adasına hücum etdiyi təqdirdə oyunun, daha doğrusu, müharibənin başlanacağı barədə xəbərdarlığından sonra mümkün olub.
Pentaqon rəsmisi Robert Menninq isə hərbi təlimlərin konkret ssenariləri haqqında danışmaqdan imtina edib. O, əsas vəzifənin ABŞ cə Cənubi Koreya ordularının təhlükə qarşısında birgə müdafiə olunmaq qabiliyyətinin yoxılanılmasından ibarət olduğunu təsdiqləyib.
ABŞ-ın digər mətbu orqanı, The Washington Times qəzeti isə Şimali Koreyanın daha bir təhlükəli silahı sınaqdan keçirmək üzrə olduğunu yazıb.
Qəzet Pxenyan rəhbərliyinin kosmosa iki peykin buraxılışını həyata keçirməsi, həmin peyklərin isə elektromaqnit impulsun (EMİ-red) köməyi ilə hücum edəcək nüvə silahları ilə təchiz olunduğu barədə məqalə dərc edib.
Bu maraqlı iddianın müəllifləri Konqresin EMİ üzrə komitəsinin üzvü, prezidnet Ronald Reyqanın elm üzrə müşaviri, NASA-nın keçmiş direktoru Uliyam Qrem və Mərkəzi Kəşfiyyat İdarəsinin keçmiş əməkdaşı, Nümayəndələr palatasının silahlı qüvvələr üzrə komitəsinin üzvü Piter Vinsent Praydır.
Məqalədə Şimali Koreya silahının konstruksiyasının ABŞ-ın 1980-ci illərə qədər istifadə etdiyi W-79 nüvə artilleriya mərmisini xatırlatdığı qeyd olunur. Bu cür qurğular Şimali Koreyanın KMS-3 və KMS-4 peyklərinə rahatlıqla yerləşdirilə bilər.
Məqalə müəllifləri hələ 2004-cü ildə iki rus generalının EMİ üzrə komissiyada Rusiyanın müvafiq texnologiya üzrə layihəsinin Şimali Koreyaya ötürülə biləcəyi ehtimalından bəhs etdiklərini xatırladırlar:
“Şimali Koreyanın KMS-3 və KMS-4 peykləri qütb trayektoriyası üzrə cənub istiqamətində buraxılıb və özünün ilk orbitində ABŞ-ın üzərindən keçiblər. Cənub qütbünün trayektoriyası ABŞ-ın ballistik raketləri dərhal sezməyə imkan verən radiolokatorlarından və HHM sitemlərindən yayınmağa imkan verir. Bu peyklər döyüş qabiliyyətinə və texniki göstəricilərinə görə Ruiyanın soyuq müharibə illərində hazırlanan və orbital bombardman sistemi adı verilən gizli silahına çox yaxındır. Belə bir sistemlə nüvə silahını daşıyan peyklə elektrmaqnit impulsun köməyi ilə qəfil hücum həyata keçirmək mümkündür”.
Məqalədə məsələnin məhəl qoyulmayacaq dərəcədə təhlükəli və real olduğu vurğulanıb, habelə ABŞ rəhbərliyi Şimali Koreya peyklərinin buraxılmasına mane olmaq üçün aktiv tədbirlər görməyə çağırılır.
“Ötən əsrin nəsilləri ilk dəfə 1957-ci ildə orbitə buraxılan peyklərin kosmosda və nüvə raketləri üzrə rəqabətdə hansı strateji əhəmiyyətə malik olduğunu dərhal başa düşdülər. Lakin bu gün EMİ haqqında biliklərin az olduğunu nəzərə alaraq Şimali Koreya raketlərinin təhlükəlilik dərəcəsini sonadək anlayan adam olduqca azdır”, - məqalənin yekununda qeyd olunub.(musavat.com)
pia.az