ABŞ Senatının demokrat üzvləri Cin Şeyhin və Şeldon Uaythauz dünyanın 8 iri bankına sorğu göndərib
Musavat.com xəbər verir ki, bu barədə “The Wall Street Journal” qəzetinin yazarı Bayron Taunun yazısında məlumat yer alıb.
Senatorlar həmin banklardan ABŞ-ın sanksiyasına məruz qalan 96 rus oliqarxına göstərdikləri xidmət, onların aktivləri və hesabları haqqında məlumat vermələrini istəyiblər.
Sorğu məktubu keçən həftədən təqdim olunub. Şeyhin və Uaythauz bununla bağlı 3 bankdan müvafiq bildiriş aldıqlarını söyləyiblər.
Yazıda sorğunun ABŞ-ın Bank of America Corp., JPMorgan Chase & Co. və Citigroup Inc, Böyük Britaniyanın BarclaysPLC, HSBC Holdings PLC ADR, Almaniyanın Deutsche Bank AG və İsçevrənin Credit Suisse Group AG banklarına verildiyi qeyd olunub.
“JPMorgan”ın nümayəndəsi məktubu aldıqlarını təsdiqləyərək onu araşdırdıqlarını bildirib. “Deutsche Bank” şərh verməkdən boyun qaçırıb. Qalan banklar isə ümumiyyətlə mətbuata bu barədə informasiya verməkdən imtina ediblər.
Senatorlar məktubda sanksiya altına düşən şəxslərin hansı yollarla ABŞ-ın və digər beynəlxalq maliyyə sistemlərindən yararlandığını bilmək istədiklərini qeyd etməklə bərabər, banklara Rusiyadan oğurlanan pulların yuyulmasını aşkar etməkdən ötrü tərtib olunan sanksiya siyahısından istifadə etmələrini tələb ediblər.
“Bu siyahı korrupsiyada və dövlət aktivlərinin qeyri-ədalətli şəkildə özəlləşdirilməsi sayəsində iştirak edərək hədsiz var-dövlət qazanan rusiyalı oliqarxların və yüksək vəzifəli şəxslərinin bizim maliyyə sistemlərimizdən yararlanmalarını aşkar etmək və məhdudlaşdırmaq üçün rəhbər rolunu oynamalıdır”, - məktubda deyilir.
Qəzetin yazdığına görə, məktub informasiyanın könüllü şəkildə verilməsi barədə verilən sorğu xarakteri daşıyır və bankların üzərinə hər hansı öhdəlik qoymur. Lakin, əldə olunan məlumata əsasən, adı çəkilən senatorlar Baş Nəzarət İdarəsindən (bu müşahidəçi orqan təhqiqat səlahiyyətlərinə malik olub birbaşa Konqresə tabedir -red.) həmin şirkətlərin sorğuya cavab verməkdən imtina etmələri halında, onlar haqqında tədbir görülməsini xahiş edəcəklər.
pia.az