Pentaqon Rusiya və Çin sosial şəbəkələrini araşdırmaq üçün xüsusi proqram təminatı axtarır
İKT.lent.az-ın xəbərinə görə, bu barədə ABŞ Hərbi Dəniz Donanmasının Departamenti tərəfindən dövlət satınalmaları saytında sorğu yerləşdirilib. Sorğuya əsasən hərbi dəniz kəşfiyyatı Rusiyanın və Çinin sosial şəbəkələrinin məzmununu öyrənməyə imkan verən proqram təminatı əldə etmək istəyir. Xüsusən onları “VKontakte” sosial şəbəkəsi maraqlandırır.
Söhbət “Facebook”, “Twitter”, “YouTube” və “Google+” kimi sosial şəbəkələrdən informasiya toplamağa imkan verən “SocioSpyder” (sosial hörümçək) proqramının inkişafı və dəstəklənməsindən gedir. Sifarişçi xüsusi olaraq Rusiya və Çin sosial şəbəkələrinə istiqamətlənmiş əlavə modul axtarışındadır. Bu cür proqramın yaradılması ilə ABŞ xüsusi xidmətləri 2012-ci ilin əvvəlindən maraqlanmağa başlayıblar. Həmin vaxtı dövlət satınalmalarının saytında sosial şəbəkələr üçün xüsusi proqram əlavəsinin işlənib hazırlanması üzrə dövlət sifarişi yerləşdirilib. Bu əlavə kifayət qədər intellektual olmalıdır ki, çoxsaylı mətnlərdə araşdırma apararkən hansısa hadisənin baş verdiyini göstərən açar söz və cümlələri ayırd edə bilsin. Məqsəd fövqəladə vəziyyətlərin, terrorçuluq fəaliyyətinin və təcili müdaxilə tələb edən digər halların qarşısının alınmasında xüsusi xidmət orqanlarına kömək etməkdir.
pia.az