5 ölkənin xarici işlər nazirləri Moskvada görüşdü

Moskvada Xəzəryanı ölkələrin xarici işlər nazirlərinin konfransı keçirilib. Nazirlərin görüşündə bu ilin payızında Həştərxanda keçiriləcək Xəzər sammitinin gündəliyi, proqramı və yekun sənədləri müzakirə olunub.

2010-cu ildə Bakıda keçirilmiş sammitin qərarlarının yerinə yetirilməsi üzrə ekspertlər səviyyəsində görülən işlər təhlil edilib. Konfransda Rusiyanın xarici işlər naziri Sergey Lavrov, Azərbaycanın xarici işlər naziri Elmar Məmmədyarov, Qazaxıstanın xarici işlər naziri Erlan İdrisov, Türkmənistanın xarici işlər naziri Rəşid Meredov və İranın xarici işlər naziri Məhəmməd Cavad Zərif iştirak edirlər.

Azərbaycanın xarici işlər nazirinin müavini Xələf Xələfovun görüşün nəticələri ilə bağlı açıqlama verib.

Xələf Xələfovun sözlərinə görə, Türkmənistanla-Azərbaycan arasında Xəzər dənizinin bölüşdürülməsi istiqamətində danışıqlar davam etdirilib: “Danışıqlar hələ yekunlaşmayıb. Hər iki dövlətin nümayəndələri arasında ara-sıra görüşlər geçirilir. Məncə hər hansı bir mübahisəli yataqdan danışmaq yersizdir”.

Konfransa ev sahibliyi edən Rusiyanın xarici işlər naziri Serqey Lavrov həmkarlarının ortaq təşəbbüslər ətrafında bir araya gəldiklərini vurğulayıb. Lavrov deyib ki, biz burada sülh, sabitlik və nəzərəçarpacaq inkişaf şəraitində olan Xəzəryani region üçün, xalqlarımızın tərəqqi və intibahı üçün göstərdiyimiz təşəbbüslər ətrafında, zamanın sınağından çıxmış yaxşı qonşuluq münasibətləri ətrafında birləşmişik.