Deputat həyəcan təbili çalır...
"Havalar istiləşdikcə Neftçalada içməli su məsələsi daha ciddi problemə çevrilir. Kürün Xəzərə tökülən yerində üzən qurğular işləyir, delta dərinləşdirilir, buna baxmayaraq, şor su Kür boyu qalxmaqda davam edir və artıq Surra kəndinə çatıb".
PİA.az xəbər verir ki, bunu millət vəkili, Xalq şairi Sabir Rüstəmxanlı deyib.
O bildirib ki, deltada cənub istiqamətli Bala Kürü bağlamaq düzgün olmayıb: "Balıq mafiyasına görə çayın təbii istiqamətini dəyişmək olmazdı. Bunu yerli adamlar deyir. Kürü tanıyan, təcrübəli adamlar... Mən də ötən yazımda buna işarə vurmuşdum. Doğrudur, yalandır? Qoy təcili komissiya yaradılsın, mütəxəssislər və yerli adamlar müzakirə eləsinlər, bir çıxış yolu tapılsın. Verilən təklif böyük xərc tələb eləmir. İndiki halda görülən işlər fəlakətin qarşısını almır, vəziyyəti daha da ağırlaşdırır".
Deputat həmçinin Neftçalaya çəkilən su kəməri haqqında da fikrini bildirib. Bildirib ki, burda qərar birmənalı olmalıdır: "Bu, Aralıq dənizi sahilinə neft, qaz kəmərləri çəkən ölkə üçün su içimi kimi bir işdir. Yay uzunu 80 min əhalini maşınla, ovuc-ovuc paylanan suyla təmin etmək olmaz. 40 km-lik kəmər nədir ki?! Tikinti təşkilatları cəlb edilsə, gecə-gündüz iş getsə, on günə bitirmək olar. Gərək hökumətimiz Neftçalada vəziyyətin ciddiliyinə ciddi yanaşsın. Payızı gözləmək olmaz!".(Dominant.az )
pia.az