Mövsümə uğurlu başlanğıc edən "Roma"da son vaxtlar eniş müşahidə olunur
PİA.AZ apasport.az-a istinadən xəbər verir ki, İtaliya mətbuatı bunu "Qarabağ"la əlaqələndirir.
Belə ki, dekabrın 5-də Çempionlar Liqasının qrup mərhələsinin son turunda "Qarabağ" üzərində evdə 1:0 hesablı qələbə qazanan "canavarlar" həmin günə qədər azarkeşlərini sevindirirdilər. Lakin Azərbaycan çempionu ilə qarşılaşmadan bəri A seriyasında və İtaliya kubokunda ümumilikdə 6 görüş keçirən paytaxt təmsilçisi bunların yalnız 1-də qələbə üzü görüb. O da dekabrın 16-da "Kalyari" üzərində baş verib - 1:0.
"Kyevo" və "Sassuolo" ilə bərabərə qalan "Roma" müvafiq olaraq "Torino", "Yuventus" və son olaraq da "Atalanta"ya uduzub. İtalyanlar məhz "Qarabağ"la qarşılaşmadan sonrakı enişin səbəblərini araşdırmağa başlayıblar.
Qeyd edək ki, A seriyasında 20 turdan sonra turnir cədvəlinin 5-ci pilləsində qərarlaşan "Roma" ölkə kubokunda mübarizəni 1/8 finalda dayandırıb.
pia.az