“Apple” korporasiyası köhnə “iPhone” modellərinin işini yavaşlatdığına görə müştərilərdən üzr istəyib
Lent.az-ın “Business Insider”a istinadən verdiyi xəbərə görə, “Apple” məsələ ilə əlaqədar istehlakçılara ünvanlanmış rəsmi açıqlama yayıb. “Biz bilirik ki, bəziləriniz “Apple”ın sizləri pis vəziyyətdə qoyduğunu hiss edirsiniz. Sizlərdən üzr istəyirik”, - deyə açıqlamada bildirilir.
Şirkət smartfonlardakı batareyaların fəaliyyəti barədə məlumat verib və köhnə modellərin işində dəyişikliklər etməsinin səbəbini izah edib: “Əvvəla, biz müştərilərin yeni modellər alması məqsədilə “Apple”ın hansısa məhsulunun xidmət müddətini azaltmağa və ya istifadəçi interfeysini pisləşdirməyə getmərik. Məqsədimiz hər zaman bu olub ki, istehlakçılarımızın xoşuna gələn məhsullar və mümkün qədər çox işləyəcək “iPhone”lar yaradaq. Müştərilərin etimadı bizim üçün hər şeydir. Biz bu etimadı qazanmaq və saxlamaq istiqamətində işimizi heç vaxt dayandırmayacağıq. Biz yalnız sizin etimadınız və dəstəyinizlə sevdiyimiz içi davam etdirə bilərik”.
Müştərilərinin etimadını bərpa etmək üçün korporasiya bir sıra addımlar atmaq qərarına gəlib. Onlar arasında dəyişdiriləcək batareyaların qiymətinin 50 dollar aşağı salınması, eləcə də batareyanın vəziyyətinə nəzarət etməyə imkan verən yeni iOC versiyası da var.
Xatırladaq ki, daha əvvəl şirkət köhnə “iPhone” modellərində proqram təminatının işini yavaşlatdığını etiraf edib. Bunun səbəbi köhnəlmiş batareyaların ömrünü uzatmaq cəhdi kimi izah olunub.
pia.az